Şirkətin meneceri: Azərbaycanda boya istehsalı müəssisəsi qurmağı planlaşdırırıq
Bakı, 12 dekabr, AZƏRTAC
Azərbaycanda neft hasilatının başlanması ilə dənizdə inşa edilən platformaların yerli əhəmiyyətli boru xətlərinin və müxtəlif zavodlarda istifadə olunan avadanlıqların rənglənməsinə ehtiyac yarandı. Həmin dövrdən etibarən biz bir sıra böyük layihələr hazırlayıb həyata keçirdik.
Bunu AZƏRTAC-a müsahibəsində “Jotun Boya Sənayi və Ticarət A.Ş.” şirkətinin ekspert-meneceri Ufuk Ərkmən deyib. Onun sözlərinə görə, baş ofisi Norveçdə yerləşən şirkətin Türkiyə və Azərbaycanda da filialları fəaliyyət göstərir. Bu filiallarda neft və qaz sahəsində qurulan qurğuların, eləcə də gəmilərin rənglənməsi həyata keçirilir. Xüsusi texnologiya ilə Türkiyədə istehsal olunan müxtəlif rəngli boyalar metal konstruksiyalara tətbiq olunur və onların korroziyadan etibarlı şəkildə qorunmasını təmin edir.
“Biz Azərbaycanda bp və SOCAR-ın sifarişlərini yerinə yetiririk. Yalnız texniki qulluq göstərmirik, həm də rənglənən qurğuların sonrakı nəzarətini aparırıq. Dənizdəki “Şahdəniz-2” platformasının, Səngəçal terminalındakı qurğu, boru xətləri və irihəcmli çənlərin, Heydər Əliyev adına Dərin Özüllər Zavodu və Bakı Gəmiqayırma Zavodunun avadanlıqlarının, SOCAR-ın amonyak və polimer zavodlarının, həmçinin Ələt limanındakı gəmilərin rənglənməsi bizim şirkət tərəfindən icra edilib”, - deyə ekspert-menecer bildirib.
Onun sözlərinə görə, AMPP və FRDİOS kimi beynəlxalq standartlara cavab verən sertifikatlara malik olan şirkət Azərbaycanda yerli mütəxəssislərin hazırlanmasına da xüsusi önəm verir. Filiala işə qəbul olunanlar arasından seçim aparılır və həmin mütəxəssislər Norveçə təlimə göndərilir.
“Məsələ ondadır ki, şirkətin istehsal etdiyi məhsullar adi boya deyil. Onlar xüsusi texnologiya ilə hazırlanır, kimyəvi maddələrə və yanğına qarşı yüksək dözümlüdür. Dənizin duzlu suyu platformaların dayaqlarını sürətlə korroziyaya uğrada bilər. Lakin boyandıqdan sonra bu konstruksiyalar uzun müddət problemsiz xidmət göstərir”, - Ufuk Ərkmən vurğulayıb.
O əlavə edib ki, gələcəkdə Azərbaycanda boya istehsalı müəssisəsi qurmaq planlaşdırılır və bu istiqamətdə hazırlıq işləri aparılır.
Bölmənin digər xəbərləri
