“SİVİLİZASİYALAR ALYANSI” TƏŞƏBBÜSÜNÜN HƏMSƏDRLƏRİ YAXIN ŞƏRQDƏKİ VƏZİYYƏTLƏ BAĞLI BƏYANAT VERMİŞLƏR
Türkiyənin Azərbaycandakı səfirliyindən AZƏRTAC-a bildirmişlər ki, bəyanatda Yaxın Şərqdəki gərginliyin çoxsaylı insan tələfatına səbəb olduğu göstərilmiş, terrorizmin hər növü pislənmişdir.
Türkiyənin Baş naziri Rəcəb Tayyib Ərdoğan və İspaniya Krallığı Nazirlər Şurasının sədri Xose Luis Rodriges Sapatero güc tətbiqini pisləmiş, girov götürülənlərin dərhal buraxılmasını tələb etmişlər.
Bəyanatda deyilir: “Biz Yaxın Şərqdə qarşıdurmanın qaçılmaz olmadığına, əksinə bölgədə sülhün mümkünlüyünə inanırıq. Bundan əlavə, problemin həlli yolları müəyyənləşmişdir. İndiyədək sülhün əldə olunması üçün göstərilmiş səylərə nəzər salmaqla, təcili olaraq, sülhü təmin etməliyik. Bundan ötrü bölgədə sülhün və təhlükəsizliyin təminatına aidiyyəti olan tərəflərin siyasi iradəsi lazımdır”.
Bəyanat müəllifləri BMT-ni, Avropa İttifaqını və digər beynəlxalq təşkilatları, xalqları bölgədəki gərginliyə son qoymaq üçün səylərini artırmağa çağırırlar.
