Soçi görüşü Azərbaycanın haqlı mövqelərinin Rusiya tərəfindən dəstəkləndiyini göstərdi
Bakı, 27 noyabr, AZƏRTAC
Soçi görüşü bütün mənalarda Azərbaycan üçün uğurlu oldu. Ən birinci uğur elə Soçi görüşünün baş tutması idi. Belə ki, ötən il noyabrın 10-da imzalanmış Birgə Bəyanatın ildönümü ərəfəsində Rusiyada belə bir görüşün keçiriləcəyi ilə bağlı məlumatlar yayıldı. Lakin Ermənistanın baş naziri N.Paşinyan bu görüşdən müvəqqəti yayına bildi. Noyabrın 10-u ərəfəsində görüşün baş tutmayacağı qətiləşdikdən dərhal sonra tərəflərin razılığı əsasında Azərbaycan Prezidenti ilə Ermənistanın baş naziri arasında görüşün dekabrın 15-də Brüsseldə keçiriləcəyi məlum oldu. N.Paşinyanın bütün ümidləri məhz bu görüşə idi. Artıq manevr imkanlarının tam tükəndiyini aydın dərk edən Paşinyan Avropada ən azından vaxt udmaqla, ağır məğlub durumda hər hansı bir sənədi imzalamaqdan yayınmağa ümid edirdi.
Bu fikirləri AZƏRTAC-a açıqlamasında Milli Məclisin deputatı, Sosial Tədqiqatlar Mərkəzinin (STM) İdarə Heyətinin sədr müavini, siyasi elmlər doktoru Elşad Mirbəşiroğlu deyib.
Deputat vurğulayıb ki, həm Azərbaycan, həm də Rusiya Azərbaycan-Ermənistan sərhədində delimitasiyanın və demarkasiyanın aparılmasının vacibliyindən çıxış etməkdədir. Sərhədlərin müəyyənləşməsindən sonra isə tərəflər qarşılıqlı şəkildə biri-birilərinin ərazi bütövlüklərini tanımalı və yekun sülh sazişi bağlanılmalıdır. Ermənilər işğalçılıq siyasətinin fəsadlarını yaşamaqda davam edəcəklər.
Bütün proseslərin Azərbaycanın maraqlarına uyğun cərəyan etdiyini vurğulayan E.Mirbəşiroğlu deyib: “Təbii ki, Azərbaycanın maraqlarına uyğun istənilən hadisə Ermənistanda narahatlıq yaradır və Paşinyanın vəziyyətini daha da ağırlaşdırır. Soçi görüşündən sonra Ermənistanda kütlənin yenidən küçələrə çıxması bunu bir daha sübut etdi. Paşinyanın görüşə qədərki davranışları, mimikası və Ermənistanda müşahidə olunanlar təsdiqlədi ki, Soçi görüşü Azərbaycanın xeyrinə nəticələnəcək. Yuxarıda deyilənləri təkrar etməklə bir daha vurğulamaq istəyirəm ki, görüş Paşinyanın Brüssellə bağlı ümidlərini puç etdi. Rusiya Prezidenti V.Putin Brüssel görüşünə qədər nəticələrin əldə edilməsinin vacibliyini vurğuladı. Yəni, o, Brüssel görüşünün sırf deklarativ xarakterli olması üçün bütün addımların atılacağına işarə etdi. Bundan itirən tərəf isə yalnız Ermənistandır”.
Siyasi elmlər doktorunun sözlərinə görə, Soçi görüşündə ölkəmiz bütün vacib məqamlarla bağlı mövqelərinin ifadə edilməsinə nail oldu. Azərbaycan Prezidenti Rusiya sülhməramlılarının xidmətindən razı olduğunu bildirməklə yanaşı, ermənilərin təxribatlarının hələ də davam etdiyini də səsləndirdi. Görüş Ermənistanın reallıq hissinin özünə qaytarılması baxımından təsirli olacaq. Çünki Ermənistan istənilən vasitələrlə Birgə Bəyanatın şərtlərinə əməl etməkdən, sərhədlərin müəyyənləşdirilməsindən və yekun sülh sazişinin bağlanmasından yayınmağa çalışır. Amma Paşinyan növbəti dəfə daha aydın dərk etdi ki, qeyd olunan istiqamətlərdə addımlar atmaqdan başqa yolu yoxdur. Tərəflərin ötən ilin noyabrında, bu ilin yanvarında imzalanmış bəyanatlara istinad edəcəyi Soçi sənədində də ifadəsini tapdı.
Deputat bildirib ki, nəqliyyat kommunikasiyalarının açılması, iqtisadi layihələrin həyata keçirilməsi, sərhədlərin müəyyənləşdirilməsi üçün komissiyanın yaradılması dəyişməz məqsədlər kimi bir daha təsdiqləndi. Bundan başqa, Paşinyanın gözləntilərinin əksinə olaraq, status və hərbi əsrlər məsələsinə ümumiyyətlə toxunulmaması da aydın göstərdi ki, Rusiya Azərbaycanın haqlı maraqlarını dəstəkləyir. Azərbaycan Respublikasının Prezidenti İlham Əliyev də proseslərdə Rusiyanın rolunu və Azərbaycan-Rusiya münasibətlərinin strateji xarakterini xüsusi qeyd etdi. Ayrıca olaraq, sənəddə “Dağlıq Qarabağ münaqişəsi” ifadəsinin yer almaması da Rusiyanın Azərbaycanın mövqelərinə hörmətlə yanaşması kimi qiymətləndirilməlidir. Ermənistanın baş naziri Paşinyan isə Soçi fiaskosunun bütün əlamətlərini duruşunda və üzündə büruzə verirdi. Guya Azərbaycanın Ermənistan ərazilərinə daxil olması ilə bağlı iddiaları, ümumiyyətlə, Rusiya tərəfində heç bir reaksiya doğurmadı.
“Beləliklə, Soçi görüşü bütövlükdə Azərbaycanın haqlı mövqelərini təsdiq etdi və Rusiya tərəfindən dəstəkləndiyini göstərdi. Azərbaycan və Rusiya regionda təhlükəsizliyin və sülhün təmin olunması üçün birgə səylər göstərmək iradəsini növbəti dəfə ortaya qoydular. Ermənistana və onun Qərbdəki havadarlarına isə artıq start götürmüş müsbət proseslərə mane ola bilməyəcəkləri mesajı ötürüldü”, - deyə E.Mirbəşiroğlu fikirlərini yekunlaşdırıb.
Bölmənin digər xəbərləri
