SİYASƏT
Son 20 ildə ölkədə qazlaşdırma səviyyəsi 40 faizdən 96,3 faizə çatıb
Bakı, 14 oktyabr, C.Rüstəmov, AZƏRTAC
2003-cü ildə ölkə üzrə qazlaşdırma səviyyəsi 40 faiz təşkil edirdisə, hazırda bu göstərici 96,3 faizə çatıb.
AZƏRTAC xəbər verir ki, bunu dövlət başçısı İlham Əliyevin birinci müddətə Azərbaycan Respublikasının Prezidenti seçilməsinin 20 illiyi münasibətilə Bakıda keçirilən “Vətənə, xalqa və dövlətçiliyə misilsiz xidmətin 20 ili” mövzusunda konfransda çıxışı zamanı Baş nazir Əli Əsədov deyib.
Baş nazir bildirib ki, dövlət başçısının şəxsi müdaxiləsi nəticəsində 14 illik fasilədən sonra blokadada olan Naxçıvan Muxtar Respublikasına 2005-ci ildə təbii qazın nəqli təmin edilib: “Rayon və şəhərlərimizdə su təchizatı sistemləri yenidən qurulub, şəhərlərimizə yeni mənbələrdən suyun verilməsi təmin edilib. Prezident İlham Əliyevin səyləri nəticəsində 2010-cu ildə Oğuz-Qəbələ-Bakı su kəmərinin istismara verilməsi Bakı şəhərinin su təchizatı ilə bağlı probleminin həllinə mühüm töhfə verib. Son iki dekadada əsaslı vəsait qoyuluşu hesabına həyata keçirilən tədbirlər nəticəsində ümumi sututumu 500 milyon kubmetrə yaxın olan 8 iri su anbarı (o cümlədən Taxtakörpü, Şəmkirçay, Tovuzçay, Göytəpə) tikilmiş və ya təmir-bərpa edilib. Bundan başqa, son 20 ildə regionlarda 380-dən çox su anbarı tikilib və yenidən qurulub.