SPECA ÖLKƏLƏRİ ÖZ BAZARLARINI ASİYADA GENİŞLƏNDİRƏ BİLƏCƏKLƏR
AZƏRTAC xəbər verir ki, BMT-nin Mərkəzi Asiya İqtisadiyyatı üçün Xüsusi Proqramının (SPECA) Bakıda keçirilmiş iqtisadi forumunda enerji dividendləri və infrastrukturu, bu sahədə imkanlar və problemlərin həlli yollarının axtarılması geniş müzakirə olunmuş, enerji perspektivlərindən də danışılmışdır. Qeyd edilmişdir ki, 2030-cu ildə enerjiyə qlobal tələbat 2002-ci illə müqayisədə 60 faiz artacaqdır. Asiya-Sakit okean regionunda bu rəqəm 80 faiz təşkil edəcəkdir. Eyni zamanda, həmin müddətdə Avropada enerjiyə olan ehtiyacın 20 faiz çoxalacağı halda, Çin və Şərqi Asiyada tələbat 2 qat artacaqdır. 2030-cu ilə Çin ən iri enerji istehlakçısına çevriləcəkdir. Onun enerjiyə tələbatı Cənubi və Şərqi Asiya ölkələrinin birlikdə tələbatına bərabər olacaqdır. Proqnozlar göstərir ki, Çin öz ehtiyacının yarısını kömürün hesabına ödəyəcəkdir. Digər tərəfdən, Cənubi və Şərqi Asiya ölkələrində neftlə qaza tələbatın Çindən çox olacağı proqnozlaşdırılır. Asiya ölkələrinin energetika təhlükəsizliyi baxımından enerji daşıyıcıları paketinin, habelə idxal mənbəyinin diversifikasiyası siyasətinin yeridiləcəyi gözlənilir. Beləliklə, SPECA ölkələri öz bazarlarını Asiyada genişləndirmək üçün potensial imkan qazanacaqlar.
Xatırladaq ki, SPECA-nın tərkibinə Azərbaycan, Əfqanıstan, Qazaxıstan, Qırğızıstan, Tacikistan, Türkmənistan və Özbəkistan daxildirlər.
Bölmənin digər xəbərləri
