Stounhenc daşlarının yaxınlığında neolit dövrünə aid ərazi tapılıb
London, 23 iyun, AZƏRTAC
İngiltərənin Uitşir qraflığında Stounhenc daşlarının yaxınlığında 4500 il əvvələ aid ərazi tapılıb.
AZƏRTAC xəbər verir ki, dairə şəklində olan ərazi Stounhencdən iki mil aralıda yerləşir. Arxeoloqlar inanırlar ki, bu Britaniyada indiyə qədər kəşf edilmiş ən qədim tarixi abidədir. Çuxurlarda aparılan tədqiqatlar nəticəsində ərazinin 4500 il əvvəl neolit dövrü insanları tərəfindən qazıldığı müəyyənləşib.
Stounhenc Gizli Landşaft Layihəsini müəyyənləşdirmək üçün St Endryuv, Birminhem, Varvik, Qlazqo və Uels Trinity San David universitetlərinin alimləri birlikdə çalışıblar. Alimlər Stounhenc ətrafındakı ərazinin dünyada ən çox öyrənilən arxeoloji abidələrdən biri olduğunu açıqlayıblar.
Qeyd edək ki, abidə 1986-cı ildə UNESCO-nun Ümumdünya irsi siyahısına salınıb.
Aynurə Tağıyeva
AZƏRTAC-ın xüsusi müxbiri
London
Bölmənin digər xəbərləri
