Sumqayıtda “Zəfərdən zəfərə gedən yol” adlı tədbir keçirilib
Bakı, 6 may, AZƏRTAC
Mayın 6-da Müharibə, Əmək və Silahlı Qüvvələr Veteranları Təşkilatı və Sumqayıt Şəhər İcra Hakimiyyətinin birgə təşkilatçılığı ilə İkinci Dünya müharibəsində Faşizm üzərində Qələbənin 80 illiyi və Vətən müharibəsindəki zəfərin 5 illiyi münasibətilə “Zəfərdən zəfərə gedən yol” adlı tədbir keçirilib.
AZƏRTAC xəbər verir ki, “Konstitusiya və Suverenlik İli” çərçivəsində keçirilən tədbirdən əvvəl Ümummilli Lider Heydər Əliyevin və şəhidlərimizin xatirəsi bir dəqiqəlik sükutla yad edilib.
Tədbirdə çıxış edən Müharibə, Əmək və Silahlı Qüvvələr Veteranları Təşkilatının Sumqayıt şəhər təşkilatının sədri Sovet Şükürov xalqımızın həm İkinci Dünya müharibəsi, həm də 44 günlük Vətən müharibəsində böyük qəhrəmanlıq nümunəsi göstərdiyini və bunun heç zaman unudulmayacağını, əsrlər sonra da ehtiram hissi ilə yad ediləcəyini bildirib.
Müharibə, Əmək və Silahlı Qüvvələr Veteranları Təşkilatının sədri polkovnik Cəlil Xəlilov Hitler Almaniyası üzərində qazanılan Qələbənin əldə edilməsində Azərbaycan xalqının, Azərbaycan neftinin həlledici rol oynadığını bildirib: “İkinci Dünya müharibəsində iştirak edən 700 mindən çox azərbaycanlıdan 300 mini həlak olub, 176 min nəfərdən çox azərbaycanlı müharibədə göstərdiyi qəhrəmanlıqlara görə müxtəlif orden və medallarla təltif edilib. Tank qoşunları komandiri general Həzi Aslanov, atıcı bölük komandirinin köməkçisi İsrafil Məmmədov, partizan Mehdi Hüseynzadə və digər soydaşlarımızın qəhrəmanlığı dillər əzbəri olub. Müharibə illərində Bakı nefti nəhəng sovet hərb maşınının fasiləsiz fəaliyyətini təmin edərək Qələbəyə misilsiz töhfələr verib. Bakı neftçiləri həmin illərdə arxa cəbhədə böyük fədakarlıqlar göstəriblər”.
Sumqayıt Şəhər İcra Hakimiyyəti başçısının müavini Fərid Ələkbərov çıxışında xalqımızın keçdiyi tarixi qəhrəmanlıq yoluna diqqət çəkib, xalq-dövlət həmrəyliyinin vacibliyini vurğulayıb.
Tədbirdə çıxış edən Sumqayıt Şəhər İcra Hakimiyyəti yanında İctimai Şuranın sədri Hümbət Quliyev, yazıçı Ağalar İdrisoğlu, əmək veteranı Qorxmaz Tağıyev xalqımızın qəhrəmanlıq tarixi ilə bağlı maraqlı faktlardan bəhs edib, ölkəmizin gələcəyi naminə Prezident, Ali Baş Komandan İlham Əliyevin hər bir çağırışına hazır olduqlarını vurğulayıblar.
Bölmənin digər xəbərləri
