Sumqayıtın gənc müəllimləri Xocalı soyqırımı qurbanlarının xatirəsini yad etmişlər
Sumqayıt, 25 fevral (AZƏRTAC). Sumqayıtın gənc müəllimləri Xocalı soyqırımı qurbanlarının xatirəsini yad etmişlər.
AZƏRTAC xəbər verir ki, gənc müəllimlər əvvəlcə 1992 il fevralın 25-dən 26-a keçən gecə erməni hərbi birləşmələrinin Xocalıda dinc azərbaycanlılara qarşı həyata keçirdiyi amansız qətliam nəticəsində həyatlarını itirmiş qurbanların xatirəsini bir dəqiqəlik sükutla yad etmişlər.
Gənc müəllimlər şurası idarə heyətinin sədri Fərid Ağahüseynov Xocalı faciəsi haqqında qısa məlumat vermiş, sonra mövzu ilə bağlı videoçarx nümayiş etdirilmişdir. Gənc müəllimlər Pərviz Əliyev, Zöhrə Qəhrəmanova, Cəmalə Cəfərova, Lalə Tanrıverdiyeva və Günel Qiyasova çıxışlarında Azərbaycan xalqının XX əsrdə üzləşdiyi dəhşətli faciəni Xatın, Sonqmi soyqırımı kimi insanlıq tarixinə düşmüş qanlı olaylarla müqayisə etmişlər.
Şəhər Təhsil Şöbəsi Metodkabinetin müdiri, respublikanın Əməkdar Müəllimi Sabir Məmmədov Xocalı faciəsi haqqında tarixi faktlara əsaslanan çıxışı zamanı gənc müəllimlərə öz şagirdlərinə vətənpərvəlik ruhu aşılamağı tövsiyə etmişdir.
Bölmənin digər xəbərləri
