Şuşa teatrı Sumqayıt tələbələrinə qonaq gəlmişdir
Sumqayıt, 1 aprel (AZƏRTAC). Sumqayıt Dövlət Universitetində Azərbaycanlıların soyqırımı gününə həsr olunmuş tədbir keçirilmişdir. Azersun Holding şirkətlər qrupunun Şuşa Musiqili Dram Teatrı ilə birlikdə təşkil etdiyi tədbirdə universitetin müəllim və tələbələrinə “Ağ qayıq” tamaşası təqdim olunmuşdur.
Tədbir iştirakçıları soyqırımı qurbanlarının və Qarabağ müharibəsi şəhidlərinin xatirəsini bir dəqiqəlik sükutla yad etmişlər.
Universitetin rektoru Nadir Qəhrəmanov, Milli Məclisin deputatı Elman Məmmədov və pyesin müəllifi Enurə Abdullayeva tamaşadan əvvəl çıxış edərək bildirmişlər ki, martın 31-də, 1918-ci il mart hadisələrinin növbəti ildönümündə xalqımız soyqırımı qurbanlarının xatirəsini anır. Bu qanlı hadisələr nəticəsində on minlərlə günahsız insana divan tutulmuşdur. Tarixçilərin bildirdiklərinə görə, təkcə Bakıda bir gün ərzində 12 min dinc sakin qətlə yetirilmişdir. Natiqlər ümummilli lider Heydər Əliyevin 1998-ci il martın 26-da imzaladığı “Azərbaycanlıların soyqırımı haqqında” Fərmanın əhəmiyyətindən danışmışlar.
Sonra Şuşa Musiqili Dram Teatrının truppası rejissor Samir Qulamovun quruluş verdiyi “Ağ qayıq” tamaşasını göstərmişdir. Pyesin real hadisələrə söykənən süjetində Qarabağ müharibəsində Azərbaycan xalqının başına gətirilən müsibətdən bəhs edilir. Pyesin baş qəhrəmanları Ağgül və Camalın məhəbbəti müharibənin məşəqqətlərinə sinə gərərək, bu ağır sınaqdan ləyaqətlə çıxır.
Pyesin müəllifi, teatrın direktor müavini Enurə Abdullayeva AZƏRTAC-ın müxbirinə müsahibəsində demişdir: “137-ci mövsümünü yaşayan teatrımız Azersun Holding şirkətlər qrupu ilə fəal əməkdaşlıq edir. Ötən ilin sentyabrından etibarən “Bura vətəndir” adlı birgə aksiya həyata keçiririk. Bu tamaşa da elə həmin aksiya çərçivəsində dövlət sifarişi və holdinqin maliyyə dəstəyi ilə səhnələşdirilmişdir”. Müəllif bildirmişdir ki, teatr həmin tamaşanı Bakının, demək olar, bütün ali məktəblərində göstərmişdir, indi isə bölgələrə səfərə çıxmağa hazırlaşır.
######
 |
 |
Bölmənin digər xəbərləri
