Şuşada alovlandırılan Novruz tonqalı həm də Azərbaycanın gələcək uğurlarının müjdəsi idi
Bakı, 24 mart, AZƏRTAC
Azərbaycan Prezidenti, Müzəffər Ali Baş Komandan İlham Əliyevin işğaldan azad olunmuş ərazilərə mütəmadi səfərləri mühüm önəm daşıyır. Bu səfərlər zamanı həm xalqımız, həm də beynəlxalq aləm Ermənistanın 30 ilə yaxın bir zaman ərzində işğal altında saxladığı torpaqlardakı yaşayış sahələrini yerlə-yeksan etdiyini, daşı daşüstə qoymadığını, təbiətə amansız divan tutduğunu görür, eyni zamanda, erməni xislətinin mahiyyəti, vəhşiliyi haqqında aydın təsəvvür yaranır.
AMEA-nın Riyaziyyat və Mexanika İnstitutunun böyük elmi işçisi, mexanika üzrə fəlsəfə doktoru Emin Bağırov AZƏRTAC-a açıqlamasında daha sonra bildirib ki, işğalçının vandal əməlləri Azərbaycanın incisi sayılan Şuşadan da yan ötməyib. Düşmən bu tarixi mədəniyyət mərkəzində tarixi, mədəni abidələrimizi dağıdıb, təhqir edib, Xurşidbanu Natəvanın, Üzeyir Hacıbəylinin, Bülbülün büstlərini güllələyib, şəhəri erməniləşdirməyə cəhd göstərib. Bütün bunlara baxmayaraq, Şuşanın ruhu yaşayıb. Şuşa qəhrəman övladlarının onu yağı caynağından xilas edəcəyinə, əvvəlki qaynar həyatına, coşqun dövrünə qayıdacağına inamını, ümidini itirməyib.
Dövlətimizin başçısı Şuşada bayram tonqalı önündə müraciətində də bu barədə ətraflı bəhs edib. Prezident İlham Əliyev deyib: “Şuşa 28 il əsarətdə idi. 28 il mənfur düşmən tərəfindən dağıdılırdı, məhv edilirdi. Şuşanın tarixi siması dağıntılara məruz qalırdı. Düşmən Şuşanı erməniləşdirmək istəyirdi. Şuşada Azərbaycan xalqının irsini silmək istəyirdi. Ancaq buna nail ola bilmədi. Bəli, Şuşa dağıntılara məruz qaldı, Şuşada tarixi abidələrimiz mənfur düşmən tərəfindən dağıdıldı. Ancaq Şuşa əyilmədi, sınmadı, öz ləyaqətini qorudu, Azərbaycanın milli ruhunu qorudu və bu gün Şuşada olarkən bir daha bunun canlı şahidi oluruq. Şuşa Azərbaycan xalqının ruhunu qoruya bildi və bizi gözləyirdi. Biz də gəlməli idik və gəlmişik”.
Emin Bağırov daha sonra bildirib: “İşğal dövründə Şuşa, eləcə də yağı tapdağındakı digər rayon və şəhərlərimiz, kəndlərimiz ulu öndərimiz Heydər Əliyev, ölkə rəhbəri İlham Əliyev tərəfindən bir gün də olsa belə, unudulmadı, yaddan çıxarılmadı. Böyük Qələbə üçün ciddi tədbirlər görüldü, ölkəmizin sürətli inkişafı daim diqqətdə saxlanıldı, güclü-qüdrətli ordu yaradıldı, xalqımızın vahid ideya, vahid amal uğrunda-torpaqlarımızın azad edilməsi məqsədi ətrafında birləşdirilməsi prioritet istiqamətə çevrildi. Prezident İlham Əliyevin sözügedən müraciətdə vurğuladığı kimi, 30 il ərzində qarşıya qoyulan məqsədə - milli birliyə, milli həmrəyliyə nail olundu. Vətən müharibəsində böyük Qələbəmizi də məhz bu önəmli amil şərtləndiridi”.
Beləliklə, kifayət qədər güclü, qüdrətli Azərbaycan Vətən müharibəsində öz iradəsini və hökmünü göstərdi, müstəqillik qazandığı ilk gündən qarşısına qoyduğu hədəfə nail oldu, suverenliyinin, ərazi bütövlüyünün bərpası yolunda möhtəşəm Zəfər qazandı. Bu gün isə düşmənin 30 il ərzində işğalda saxladığı və dağıtdığı bütün dini, mədəni, qədim abidələrimizin, xaraba qoyduğu yaşayış sahələrimizin bərpasını həyata keçirir.
Emin Bağırovun sözlərinə görə, dövlətimizin başçısı tərəfindən Şuşanın işğaldan azad edildiyi ilk gündən bu tarixi şəhərimizin dirçəldilməsi üçün əməli fəaliyyətə başlanılıb. Şuşa Azərbaycanın mədəniyyət paytaxtı elan olunub. Şəhərin bərpası və tarixi simasının özünə qaytarılması istiqamətində işlərə start verilib.
Dövlət başçımızın tapşırığına əsasən, Horadiz-Füzuli, Füzuli-Şuşa dəmir yolunun tikintisi də nəzərdə tutulur. Ölkə başçısı bildirib ki, Şuşaya rahat gediş-gəlişi təmin etmək üçün dəmir yolunun çəkilməsi zəruridir. Şuşaya vətəndaşlar qayıdandan sonra bu yol istismara veriləcək.
“Dövlətimizin başçısı işğaldan azad edilən digər kənd və şəhərlərimizlə bərabər, Şuşanın bərpası ilə bağlı verdiyi tapşırıqları diqqət mərkəzində saxlayır, icrası ilə yerində tanış olur. Ölkə rəhbəri Şuşada bayram tonqalı önündə müraciətində də bu barədə ətraflı bəhs edərək bildirib ki, hazırda nəinki Şuşa, düşməndən təmizlənən bütün torpaqlarda quruculuq işləri başlanılıb, infrastruktur layihələrinə start verilib. Ziyanın hesablanması aparılır, şəhərlərin baş planları hazırlanır. Bütün bunlar insana böyük qürur verir, hər bir azərbaycanlının qəlbinə fərəh gətirir”, - deyə Emin Bağırov fikirlərini tamamlayıb.
Bölmənin digər xəbərləri
