Tacikistanlı ekspert: Bakı Düşənbənin bütün su təşəbbüslərinə ardıcıl dəstək göstərib
Bakı, 13 may, AZƏRTAC
Tacikistan su məsələləri və iqlim gündəliyi ilə bağlı beynəlxalq təşəbbüslərin inkişafı ilə bağlı Azərbaycanın dəstəyini yüksək qiymətləndirir.
AZƏRTAC xəbər verir ki, bunu Tacikistanın BMT yanında daimi nümayəndəliyinin əməkdaşı, 2018–2028-ci illər üzrə “Dayanıqlı inkişaf naminə su” Beynəlxalq Fəaliyyət Onilliyi çərçivəsində keçirilən 4-cü Yüksək Səviyyəli Beynəlxalq Konfransın Katibliyinin nümayəndəsi Təhminə Həsənova deyib.
Onun sözlərinə görə, Azərbaycan BMT çərçivəsində Tacikistanın bütün su təşəbbüslərinə ardıcıl dəstək verib.
“Bütün təşəbbüslərimizə göstərdiyi dəstəyə görə Azərbaycana çox minnətdarıq. BMT prosesləri çərçivəsində Tacikistanın su sahəsində təşəbbüsləri ilə bağlı təxminən 14 qətnamə qəbul olunub və qardaş ölkə kimi Azərbaycan onları fəal dəstəkləyib. Bütün bu sənədlər konsensus əsasında qəbul edilib”, – deyə o söyləyib.
T.Həsənova vurğulayıb ki, Azərbaycan Düşənbə Su Prosesi çərçivəsində keçirilən beynəlxalq konfranslarda fəal iştirak edir. O, həmçinin Azərbaycanın sədrliyi ilə keçirilmiş COP29 çərçivəsində iki ölkə arasında əməkdaşlığı xüsusi qeyd edib: “Azərbaycanın mükəmməl rəhbərliyi altında Su Pavilyonunun təşkili və su ehtiyatlarının iqlim gündəliyində rolunun təşviqi istiqamətində çox səmərəli əməkdaşlığımız formalaşıb. İqlimlə su ehtiyatları arasındakı sıx əlaqəni nəzərə alsaq, bu, böyük əhəmiyyət kəsb edirdi. Azərbaycan buzlaqların qorunması ilə bağlı təşəbbüslərə də mühüm dəstək göstərib. COP29 çərçivəsində buzlaqların qorunması məsələlərinə həsr olunmuş xüsusi pavilyon təşkil edilib və bu, tərəflər arasında əməkdaşlığın uğurlu nəticələrindən birinə çevrilib. COP29-un yekun sənədlərində su və buzlaqlar məsələlərinə xüsusi diqqət ayrılıb”.
O, həmçinin bildirib ki, Azərbaycan qarşıdan gələn Düşənbə Su Konfransında iştirakını artıq təsdiqləyib.
“Bundan əlavə, Tacikistan 2028-ci ildə region tarixində ilk dəfə olaraq BMT-nin su ehtiyatları üzrə konfransına ev sahibliyi edəcək. Bu, təkcə ölkələrimiz arasında deyil, həm də regionun bütün dövlətləri ilə əməkdaşlığın daha da möhkəmləndirilməsi üçün yaxşı imkan olacaq”, – deyə T.Həsənova əlavə edib.
Müxbir – Pərvanə Qafarova
Bölmənin digər xəbərləri
