Tbilisidə azərbaycanlıların soyqırımına həsr olunmuş beynəlxalq elmi konfrans keçirilib
Tbilisi, 26 aprel, AZƏRTAC
Azərbaycan Respublikasının Prezidenti yanında Bilik Fondu, Azərbaycanın Gürcüstandakı səfirliyi və Tbilisi şəhərindəki M.F.Axundzadə adına Azərbaycan Mədəniyyəti Muzeyinin birgə təşkilatçılığı ilə Tbilisidə “Soyqırımı hadisələri müasir elmi araşdırmalarda" mövzusunda beynəlxalq elmi konfrans keçirilib.
AZƏRTAC xəbər verir ki, konfrans Azərbaycan Prezidentinin “1918-ci il azərbaycanlıların soyqırımının 100 illiyi haqqında” Sərəncamı çərçivəsində təşkil olunub.
Tədbirdən əvvəl konfrans iştirakçıları Tbilisinin mərkəzindəki Heydər Əliyev parkında Ulu Öndərin büstünü ziyarət edib, abidə önünə gül dəstələri düzüblər.
Muzeyin direktoru Leyla Əliyeva tədbiri açaraq 1918-ci ilin mart-aprel aylarında və sonrakı dövrlərdə erməni millətçilərinin həyata keçirdikləri qanlı aksiyalar barədə məlumat verib.
Sonra soyqırımı qurbanlarının xatirəsi bir dəqiqəlik sükutla yad edilib.
Azərbaycanın Gürcüstandakı səfiri Dursun Həsənov çıxış edərək 100 il əvvəl - 1918-ci ilin mart-aprel aylarında Azərbaycan xalqının başına gətirilən dəhşətli faciə haqqında danışıb. Diplomat Bakı şəhərində, Bakı quberniyasına daxil olan digər şəhər və qəzalarda on minlərlə dinc sakinin məhz etnik və dini mənsubiyyətinə görə qətlə yetirildiyini, yaşayış məntəqələrinin dağıdıldığını, mədəniyyət abidələri, məscid və qəbiristanlıqların yerlə-yeksan edildiyini diqqətə çatdırıb. Bildirilib ki, həmin günlərdə daşnak-bolşevik silahlı dəstələri xüsusi qəddarlıq nümayiş etdirib, azğınlaşan erməni millətçiləri Qarabağ, Zəngəzur, Naxçıvan, Şirvan, İrəvan və digər bölgələrdə də kütləvi qətllər, talanlar törədiblər.
D.Həsənov 31 mart soyqırımına ulu öndər Heydər Əliyevin səyi nəticəsində müstəqillik illərində hüquqi-siyasi qiymət verildiyini, Ümummilli Liderin siyasi kursunun davamçısı Prezident İlham Əliyevin Sərəncamı ilə dünyanın bir çox ölkəsində soyqırımı qurbanlarının xatirəsinin anıldığını, mövzu ilə əlaqədar elmi-praktiki konfrans və digər tədbirlərin keçirildiyini diqqətə çatdırıb.
Bilik Fondunun sektor müdiri Xatirə Hüseynova fondun icraçı direktoru Oktay Səmədovun konfrans iştirakçılarına ünvanladığı məktubu səsləndirib.
Sonra Türkiyənin Gürcüstandakı səfiri Fatma Ceren Yazgen çıxış edərək ermənilərin türklərə, azərbaycanlılara, gürcülərə qarşı törətdiyi təxribatlardan danışıb. Səfir Tbilisidə Gürcüstanın elm xadimlərinin də dəstəyi ilə belə bir tədbirin təşkilini yüksək qiymətləndirib. Bunun dostluğumuzun bariz nümunəsi olduğunu bildirib.
Gürcüstan Milli Akademiyasının prezidenti Qeorqi Kvesitadze çıxışında bu cür tədbirlərin təşkilinin vacibliyini vurğulayıb, tədbiri yüksək qiymətləndirib, konfransın işinə uğurlar arzulayıb.
Çeçenistan Respublikası Yazıçılar Birliyinin sədri Kanta İbraqimov azərbaycanlıların soyqırımı ilə bağlı fikirlərini bölüşüb, azərbaycanlıların sülhsevər olduğunu diqqətə çatdırıb.
Sonra Gürcüstanın Milli Müdafiə Akademiyasının baş instruktoru, tarix elmləri doktoru, akademik Şadiman Bidzadze “Soyqırımı hadisələri (1918-1920)”, Bakı Dövlət Universiteti Tarix fakültəsinin dekanı, dosent Azad Rzayev “1918-ci ildə azərbaycanlıların soyqırımının səbəbləri”, tarixçi alim, professor Badri Qoquadze “Azərbaycanlıların soyqırımının 100-cü ildönümü”, AMEA-nın A.Bakıxanov adına Tarix İnstitutunun böyük elmi işçisi, tarix üzrə fəlsəfə doktoru Vaqif Abışov “Bakı və Gəncə quberniyalarında azərbaycanlıların soyqırımı”, səfirliyin məsul əməkdaşı Fəxri Hacıyev “Azərbaycanlıların soyqırımı gürcü mənbələrində”, “Gürcüstan-Azərbaycan Dostluq Fondu”nun icraçı direktoru Simon Kopadze “1918-ci il azərbaycanlıların soyqırımı”, Bakı Dövlət Universiteti Jurnalistika fakültəsinin dosenti Sevinc Əliyeva “1918-ci il azərbaycanlıların soyqırımı mətbuatda”, “Art Paralel” Televiziya şirkətinin sədri, politoloq Tenqiz Txilava “Soyqırımın 100-cü ildönümü”, Bilik Fondunun sektor müdiri Hacı Abdulla “Azərbaycan Xalq Cümhuriyyətinin Tiflis dövrü fəaliyyəti”, Gürcüstanın Marneuli rayonu Sadaxlı kənd orta məktəbinin direktoru Adil Şərifov “Gürcüstan azərbaycanlıları 1918-ci il soyqırımının kədərini bölüşürlər”, Gürcüstan Müharibə Veteranları Cəmiyyətinin sədri Qəhrəman Musayev “Azərbaycanlıların soyqırımı” adlı məruzələrlə çıxış ediblər.
Müzakirələrdən sonra Axundov adına Azərbaycan Mədəniyyəti Muzeyinə soyqırımı həqiqətlərini özündə əks etdirən elmi-kütləvi ədəbiyyat nümunələri hədiyyə edilib.
Tədbirdə Türkiyənin Gürcüstandakı səfirliyinin, Gürcüstanın Milli Elmlər Akademiyasının, eləcə də ictimaiyyətin nümayəndələri, tələbələr iştirak ediblər.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
