TBİLİSİDƏ BEYNƏLXALQ KONFRANS KEÇİRİLMİŞDİR

19.06.2004 [11:38]
Çap et
A⁺ A^-

Gürcüstanın paytaxtı Tbilisidə YUNESKO-nun və Gürcüstan xalq müdafiəçisi təsisatının birgə təşkil etdikləri “Dözümlülük, insan hüquqları, ksenofobiya və diskriminasiya əleyhinə mübarizə” mövzusunda beynəlxalq konfrans keçirilmişdir. Konfransda Rusiya, Gürcüstan, Azərbaycan və Ermənistan ombudsman təsisatlarının nümayəndələri, həmçinin bu respublikaların insan hüquqları ilə məşğul olan dövlət və qeyri-hökümət təşkilatlarını təmsil edən nümayəndə heyətləri iştirak etmişlər. Bu mötəbər məclisdə Azərbaycan Respublikasını ombudsman aparatının əməkdaşı A.Səfixanlı təmsil etmişdir.

Ombudsman aparatından AZƏRTAC-a bildirmişlər ki, Gürcüstanın xalq müdafiəçisi əvəzi Teymuraz Lomsadze konfrans iştirakçılarını salamlamış və iki gün ərzində keçiriləcək tədbirin məqsəd və vəzifələrini açıqlamışdır.

Konfrans öz işini beş işçi qrupunda davam etdirmiş, “Dözümlülük və ayrı-seçkiliyin qadağan olunmasında beynəlxalq təşkilatların rolu”, “Ombudsman təsisatı və milli hüquq-müdafiə mexanizmləri”, “Demokratik dəyərlərin təhsil vasitəsilə təsdiqində dövlətin rolu” mövzuları ətrafında müzakirələr aparılmışdır.

Təşkilatçıların hazırladıqları Qafqaz regionunda sülh və insan hüquqlarının müdafiəsi prinsiplərini özündə əks etdirən qətnamə konfrans iştirakçılarına təqdim olunaraq müzakirəyə çıxarılmışdır. Müzakirələr zamanı A.Səfixanlı bu qətnaməyə bəzi əlavə və dəyişikliklərin edilməsi ilə bağlı təkliflər irəli sürmüşdür.

Azərbaycan ombudsman institutunun təklifləri konfransın qətnaməsinin yekun layihəsində nəzərə alınmışdır.

Tədbirin sonunda KİV nümayəndələri ilə konfrans iştirakçılarının görüşü keçirilmişdir.