Təbrizdə Ulu Öndər Heydər Əliyevin xatirəsi anılıb
Bakı, 11 dekabr, AZƏRTAC
Azərbaycan Respublikasının Təbriz şəhərindəki Baş konsulluğu 12 Dekabr - Ümummilli Lider Heydər Əliyevin anım günü münasibəti ilə diplomatik nümayəndəliyimizin inzibati binasında tədbir keçirib.
Baş konsulluqdan AZƏRTAC-a bildiriblər ki, tədbir zamanı “Tarixin izi ilə” adlı tarixi-sənədli film nümayiş etdirilib, həmçinin fotosərgi təşkil olunub.
Tədbirdə İranın Şərqi Azərbaycan valiliyinin sosial məsələlər üzrə baş direktoru Məhəmməd Əsudallahi və Şərqi Azərbaycan valiliyinin siyasi məsələlər üzrə baş direktorunun müavini Məhəmməd Bamdadi, İran XİN-nin Şimal-Qərb nümayəndəliyinin rəhbəri Tohid Nəzəfzadə və Şimal-Qərb nümayəndəliyinin əməkdaşları, Türkiyənin Təbrizdəki baş konsulu Çetin Taner və Baş Konsulluğun əməkdaşları, Təbriz mətbuat evinin rəhbəri Mürtəza Şəfiyi, Təbrizdə yaşayan Azərbaycan Respublikası vətəndaşları və onların ailə üzvləri, azərbaycanlı tələbələr iştirak ediblər.
Tədbirin əvvəlində Ümummilli Lider Heydər Əliyevin əziz xatirəsi bir dəqiqəlik sükutla yad edilib.
Baş konsul Əliyənnağı Hüseynov çıxışında bildirib ki, anadan olmasının 100 illiyini qeyd etdiyimiz və vəfatının iyirminci ildönümündə nurlu xatirəsini ehtiramla yad etdiyimiz Ulu Öndər Heydər Əliyev Azərbaycan xalqının xilaskarı və müstəqil müasir dövlətimizin memarı olaraq adını dövlətçilik tariximizə qızıl hərflərlə yazdırıb. Zaman keçdikcə, Ulu Öndərin həyata keçirdiyi dövlətçilik strategiyasının tarixi əhəmiyyəti daha aydın görünür.
Baş Konsul siyasi hakimiyyətinin bütün dövrlərində Azərbaycanın yüksəlişi, xalqlar və ölkələr arasında dostluq və qardaşlıq naminə tarixi missiya həyata keçirən Heydər Əliyevin yorulmaz fəaliyyətindən bəhs edib. O əlavə edib ki, XX əsrin 60-cı illərinin sonundan başlanan Heydər Əliyev idarəetmə fəlsəfəsinin başlıca ideya-siyasi istiqaməti xalqın milli özünüifadəsinin bütün forma və vasitələrinin geniş vüsət alması, milli qürur hissinin güclənməsi və milli şüurun yüksəlişinə təkan verən sürətli inkişaf strategiyasının gerçəkləşdirilməsi ilə səciyyəllənir. Heydər Əliyevin böyük uzaqgörənliyi sayəsində təməli həmin dövrdə daha da möhkəmləndirilmiş azərbaycançılıq ideologiyası müasir dünyada Azərbaycan Respublikasının əzəmətli yerini müəyyən edib, milli dövlətçiliyimizin ideya əsasını təşkil edərək ölkəmizin çoxşaxəli inkişafı üçün möhkəm zəmin yaradıb.
Ə.Hüseynov keçmiş SSRİ-nin süqutu illərində Azərbaycanın dövlət müstəqilliyini bərpa etmək şansı əldə etdiyini, təəssüf ki, həmin ərəfədə təcavüzkar Ermənistanın ölkəmizə qarşı əsasız ərazi iddialarının iki qonşu dövlət arasında müharibəyə çevrildiyini və torpaqlarımızın iyirmi faizinin işğal olunduğunu, həmin dövrdə Azərbaycanın Naxçıvan Muxtar Respublikasının rəhbəri seçilən Ulu Öndər Heydər Əliyevin xalqımızın nicatı üçün bir sıra tarixi addımlar atdığını, sərhəd qonşumuz olan İran ilə birbaşa xoş münasibətlərin yaranmasının tarixi əhəmiyyətini yüksək dəyərləndiryini qeyd edib. Baş konsul bildirib ki, siyasət, iqtisadiyyat, idman və mədəniyyət, elm və təhsil daxil olmaqla, bütün sahələrdə böyük uğurlar qazanan Azərbaycanın şanlı üçrəngli Bayrağı qalibiyyət və müzəffərlik rəmzi olaraq əzmlə dalğalanır. Ulu Öndərimizin müəyyən etdiyi inkişaf strategiyasının Prezident İlham Əliyev tərəfindən uğurla davam etdirilməsi və dövlətimizin yürütdüyü mehriban qonşuluq və səmimi dostluq siyasəti real bəhrəsini verir. Birmənalı olaraq qeyd etmək olar ki, Azərbaycanın ərazi bütövlüyünün və suverenliyinin bərpası və əzmlə qorunması İran üçün də mühüm əhəmiyyət kəsb edən tarixi hadisədir. Azərbaycan 2020-ci ilin sentyabrında beynəlxalq hüququn aspektlərini rəhbər tutaraq 44 günlük vətən müharibəsində rəşadətli hərbi Qələbə əldə edib. Bu tarixi Zəfəri Azərbaycana Müzəffər Ali Baş Komandan İlham Əliyevin rəhbərliyi ilə qəhrəman Ordumuz qazandırıb. Azərbaycanda ordu quruculuğunun inkişafı ulu öndər Heydər Əliyevin siyasi fəaliyyətində hər zaman mühüm istiqamət olub. “Lakin dövlətin nə qədər gücü olsa, nə qədər silahı olsa, nə qədər düzgün hərbi əməliyyatlar planlaşdırılsa da, Qələbəni əldə edən əsgərdir, zabitdir.” Bu müdrik ifadələrin müəllifi olan Prezident İlham Əliyev oktyabrın 17-də “Füzuli Şəhəri Günü”ndə bu şəhərə köçmüş sakinlər və rayon ictimaiyyətinin nümayəndələri ilə görüşündə deyib ki, döyüşə əsgər, zabit gedir, o, sinəsini qabağa verir, o, ölümə gedir və Bayrağı da qaldıran odur. Onların qəhrəmanlığı bizim yaddaşımızdan heç vaxt silinməməlidir və silinməyəcək.
Baş konsul vurğulayıb ki, dövlətimizin başçısının Azərbaycan hərbçilərinin qəhrəmanlığı barədə növbəti dəfə xoş sözləri İran İslam Respublikası ilə dövlət sərhədimizin bir addımlığında - Araz sahilində söyləməsi bizim üçün olduqca əhəmiyyətli və əlamətdardır. Çünki Ermənistanın otuz illik işğalçılıq siyasəti Azərbaycan ərazisində böyük bir zolaqda nəzarətsiz sahə yaratmışdır ki, bu xoşagəlməz vəziyyət uzun illər qonşu İran üçün də təhlükə mənbəyinə çevrilmişdi. Hər zaman riyakarlığı ilə bölgəmizə böyük təhlükələr yaradan işğalçı Ermənistan təəssüf ki, kapitulyasiya aktını imzalayandan sonra da təslimçilik öhdəliklərini yerinə yetirmədi. Davam edən təhdid və təhlükələrin genişləndiyini nəzərə alan Azərbaycan təxminən 23 saatlıq antiterror tədbirləri nəticəsində ölkə ərazisində erməni separatizminə son qoyaraq, öz suverenliyini tam bərpa etdi.
Ə.Hüseynov qeyd edib ki, Ulu Öndərimizin ən böyük arzusu və amalı işğal altındakı torpaqlarımızı düşməndən azad etmək, Azərbaycan Respublikasının ərazi bütövlüyünü və suverenliyini təmin etmək olub. İndi onun nəsillərə əmanət qoyduğu müstəqil və müasir Azərbaycan günbəgün qüdrətlənir. Ölkəmizin təhlükəsizliyi, xalqımızın firavan yaşayışı üçün dövlətimizin imkanları hər ötən gün daha da artır.
Bölmənin digər xəbərləri
