Tehranda Əfqanıstan hökuməti və “Taliban” hərəkatı arasında danışıqlar başlayıb
Bakı, 7 iyul, AZƏRTAC
Bu gün səhər saatlarında İranın paytaxtı Tehranda Əfqanıstan hökuməti və “Taliban” hərəkatının nümayəndələri arasında danışıqlar başlayıb.
AZƏRTAC ISNA agentliyinə istinadla xəbər verir ki, danışıqlar “Taliban” hərəkatı döyüşçülərinin bütün cəbhə boyu hücumları fonunda keçirilir.
Qeyd edək ki, Əfqanıstanda hökumət qüvvələri ilə kənd yerlərində əhəmiyyətli əraziləri ələ keçirən və böyük şəhərlər uğrunda döyüşlər aparan “Taliban” hərəkatı arasında qarşıdurma davam edir. 2020-ci il sentyabrın 12-də Qətərin paytaxtı Dohada Əfqanıstan hökuməti ilə “Taliban” hərəkatı arasında başlayan sülh danışıqları hələlik heç bir nəticə verməyib. Bu il aprelin 14-də isə ABŞ Prezidenti Cozef Bayden Birləşmiş Ştatlar tarixində ən uzun sürən xarici hərbi kampaniyaya çevrilən Əfqanıstandakı əməliyyatı başa çatdırmaq barədə qərar qəbul edib.
Koalisiya qüvvələrinin Əfqanıstanı tərk etməyə başlaması ilə əlaqədar hazırda ölkənin şimalında gərgin vəziyyət yaranıb. Bir qədər öncə BMT Baş katibinin xüsusi nümayəndəsi, Əfqanıstana dəstək üzrə missiyanın rəhbəri Debora Layons taliblərin may ayının əvvəlindən başlayaraq ölkənin 370 rayonundan 50-nin nəzarətini ələ keçirdiyini bildirib.
Bölmənin digər xəbərləri
