Təl-Əvivdə Ümummilli Lider Heydər Əliyevin 100 illik yubileyi münasibətilə tədbir keçirilib
Bakı, 10 may, AZƏRTAC
Azərbaycan Respublikasının İsrail Dövlətindəki səfirliyi tərəfindən Təl-Əviv şəhərində Ümummilli Lider Heydər Əliyevin 100 illik yubileyi münasibətilə tədbir keçirilib. Tədbirdə İsrail ictimaiyyətinin nümayəndələri, bu ölkədə akkreditə edilmiş səfirlər və diplomatlar, jurnalistlər, İsraildə təhsil alan azərbaycanlı tələblər və elm adamları, habelə diaspora nümayəndələri iştirak ediblər.
Ölkəmizin İsraildəki səfirliyindən AZƏRTAC-a bildirilib ki, səfir Muxtar Məmmədov tədbiri açaraq, müstəqil Azərbaycanın qurucusu Ümummilli Lider Heydər Əliyevin həyat və fəaliyyəti, eyni zamanda, Azərbaycan dövlətçiliyinin, habelə dövlətçilik ənənələrinin formalaşmasındakı rolu barədə tədbir iştirakçılarını məlumatlandırıb.
Daha sonra Türkiyə Respublikasının İsraildəki səfiri Şakir Özkan Torunlar çıxışında Ümummilli Lider Heydər Əliyev ilə 1990-cı illərdə reallaşan görüşünü xatırladaraq, tədbir iştirakçılarına dahi şəxsiyyət ilə bu görüşünün tarixçəsi barədə məlumat verib.
Tədbirdə iştirak edən İsrailin sabiq müdafiə nazirinin müavini Efraim Sne 1993-cü ilin dekabrında Prezident Heydər Əliyevlə ilk görüşünü məmnunluqla xatırlayaraq, sonrakı illərdə Azərbaycana çoxsaylı rəsmi və qeyri-rəsmi səfərləri zamanı keçirilmiş görüşlərdə aparılmış müzakirələri və əldə edilmiş razılaşmaları, habelə iki ölkə arasında strateji tərəfdaşlıq münasibətlərinin formalaşmasında Heydər Əliyevin rolunu xüsusi vurğulayıb.
Təl-Əviv Universitetinin professoru Lev Eppelbaum isə öz növbəsində tədbir iştirakçılarına Ulu Öndərin Azərbaycan elminin inkişafı istiqamətində fəaliyyəti barədə ətraflı məlumat verib.
Tədbirdə, həmçinin Ümummilli Lider Heydər Əliyevin İsrail rəsmiləri ilə keçirdiyi görüşlərdən fotolar nümayiş etdirilib.
Həmin gün İsrail Dövlətinin Prezidenti İsxaq Hersoq Ümummilli Lider Heydər Əliyev ilə bağlı tviter sosial şəbəkəsində paylaşım edib. Həmçinin İsrailin “Yisrael Beytenu” Partiyasının sədri, Knessetin (Parlamentin) üzvü Aviqdor Liberman “Dünyanın heç bir siyasətçisi məndə Heydər Əliyev kimi təəssürat yaratmayıb” başlıqlı məqaləsi dərc edilib.
Bölmənin digər xəbərləri
