Tələbə adını qazanan oğuzlu gənclər kompüter elmləri və mühəndisliklə bağlı ixtisaslara üstünlük veriblər
Oğuz, 10 sentyabr, Mustafa Dadaşov, AZƏRTAC
Bu il tam orta təhsil pilləsini başa vuran 388 nəfər oğuzlu məzundan 259 nəfəri ali məktəbə qəbul üçün sənəd verib və onlardan 191-i imtahanlarda uğurlu nəticələr göstərərək tələbə adını qazanıb, 70 məzun isə kolleclərə qəbul olub. İmtahanların nəticələrinə əsasən, bu il XI sinfi bitirən məzunların 49,2 faizi, ali məktəblərə daxil olmaq üçün sənəd verənlərin isə 73,7 faizi ali təhsil almaq imkanı əldə edib. Bu, son illər Oğuz rayonunun təhsil tarixində ən yüksək nəticədir.
Bu barədə AZƏRTAC-ın bölgə müxbirinə Şəki-Zaqatala Regional Təhsil İdarəsinin Oğuz rayonu üzrə Təhsil sektorundan məlumat verilib.
Bildirilib ki, ali məktəblərə qəbul imtahanlarında oğuzlu məzunlardan 45 nəfəri 500-700 bal arasında, o cümlədən 8 nəfər 600 baldan yuxarı nəticə göstərib. Cari ilin məzunlarından 158 nəfəri dövlət, 12-si isə özəl ali məktəblərdə təhsil alacaqlar. Onlardan 123 nəfəri ödənişsiz, 47 nəfər isə ödənişli ixtisaslara daxil olub.
Ümumiyyətlə, tələbə adını qazanan oğuzlu gənclər bu il ixtisas seçimi zamanı kompüter elmləri və mühəndisliklə bağlı ixtisaslara üstünlük veriblər. Ali məktəblərə qəbul imtahanlarında Oğuz şəhər Nail İbrahimli adına 3 nömrəli məktəb-lisey, Emin Abdullayev adına 2 nömrəli internat tipli texniki və təbiət fənləri təmayüllü lisey, Xaçmaz kənd 1 nömrəli, Qarabulaq və Tərkeş kənd tam orta ümumtəhsil məktəblərinin məzunları xüsusilə fərqləniblər.
Ali məktəblərə qəbul imtahanlarında yüksək nəticə göstərərək tələbə adını qazanmış oğuzlu gənclərlə rayon rəhbərliyinin görüşü olub. Görüşdə rayon icra hakimiyyətinin başçısı Cavid Əbdül-Qədirov, rayon Təhsil sektorunun müdiri Sərdar Nəbiyev və başqaları çıxış edərək tələbə adını qazanan bütün məzunları, onların valideynlərini təbrik edib, gənclərə savadlı və bilikli olmağı, gələcəkdə Vətənə faydalı vətəndaş kimi yetişməyi tövsiyə ediblər.
Görüşün sonunda qəbul imtahanlarında yüksək nəticə göstərmiş məzunlar, eləcə də müxtəlif fənn olimpiadalarında, müsabiqə və layihələrdə uğur qazanmış şagirdlər mükafatlandırılıblar.
Bölmənin digər xəbərləri
