TƏLƏBƏLƏR QASTROL SƏFƏRİNƏ HAZIRLAŞIRLAR

10.03.2006 [11:49]
Çap et
A⁺ A^-

AZƏRTAC xəbər verir ki, Naxçıvan Dövlət Universiteti tələbə teatr studiyasının kollektivi “Molla Nəsrəddin” jurnalının 100 illik yubileyi ərəfəsində Cəlil Məmmədquluzadənin “Anamın kitabı” əsərini tamaşaya hazırlayır.

Tamaşanın elmi məsləhətçisi universitetin rektoru, akademik, cəlilşünas İsa Həbibbəyli, quruluşçu rejissoru isə studiyanın rəhbəri Gülxar Əhmədovadır. Tamaşa martın sonunadək naxçıvanlı sənətsevərlərə təqdim ediləcəkdir.

Universitetdə Tələbə Opera Studiyası da fəaliyyət göstərir. Studiyanın kollektivi keçən il Türkiyənin İğdır, Qars, Samsun və Trabzon şəhərlərində qastrol səfərlərində olmuş və Üzeyir Hacıbəyovun “Arşın mal alan” operettasını sənətsevərlərə təqdim etmişdir.

Kollektiv yaxın günlərdə Bakı, sonra isə Ərzurum və Qars şəhərlərinə qastrol səfərlərinə çıxacaqdır.