“Təmiz Şəhər” ASC tullantıların azaldılması ilə bağlı yeni layihəsini təqdim etmişdir
Bakı, 23 oktyabr (AZƏRTAC). Oktyabrın 23-də “Park İnn” otelində “Təmiz Şəhər” Açıq Səhmdar Cəmiyyəti (ASC) tərəfindən “Tullantı kalkulyatoru” layihəsinin və “Bərk məişət tullantılarının idarə olunmasına dair terminlərin və anlayışların izahlı lüğəti”nin təqdimatı olmuşdur.
AZƏRTAC xəbər verir ki, bir sıra nazirliklərin, yerli və beynəlxalq təşkilatların nümayəndələrinin iştirak etdikləri mərasimdə “Təmiz Şəhər” ASC-nin İdarə Heyətinin sədri Zakir İbrahimov Azərbaycanda ətraf mühitin qorunması ilə bağlı bir sıra proqramların və layihələrin həyata keçirildiyini diqqətə çatdırmış, tullantıların idarə olunmasında əhalinin daha böyük rol oynadığını bildirmişdir. Demişdir ki, Heydər Əliyev Fondunun təşəbbüsü ilə Qala qəsəbəsində və İçərişəhərdə tullantıların idarə olunması sisteminin müasir standartlara uyğun qurulması üzrə pilot layihə həyata keçirilir. Layihənin məqsədi tullantıların çeşidlənmiş şəkildə toplanması, daşınması və təkrar emalını müasir şəkildə təşkil etməkdir.
Qeyd edilmişdir ki, əhalinin rifahının yüksəlməsi mütənasib şəkildə istehlak səbətinin artımına gətirib çıxartmışdır. Ehtiyacdan artıq istehlak isə öz növbəsində israfçılığa və tullantıların miqdarının artmasına səbəb olmuşdur. Buna görə də “Təmiz Şəhər” ASC tullantıların azaldılması ilə bağlı növbəti uzunmüddətli maarifləndirmə proqramına başlamışdır. Proqramın əsas məqsədi əhalini tullantıların azaldılmasına səsləməkdir. “Tullantı kalkulyatoru” layihəsi isə bu proqramın tərkib hissəsidir.
Tədbirdə layihənin ətraf mühit, iqtisadi və sosial baxımdan əhəmiyyəti vurğulanmışdır. Bildirilmişdir ki, ASC-nin saytında yerləşdirilmiş “Tullantı kalkulyatoru” ilə istifadəçilər tullantıların ətraf mühitə təsirini öyrənə və buna nəzarət edə biləcəklər. Diqqətə çatdırılmışdır ki, tullantıların heç də hamısı lazımsız deyildir. Tullantılara faydalı enerji mənbəyi, resurs kimi baxılmalıdır.
Sonra “Bərk məişət tullantılarının idarə olunmasına dair terminlərin və anlayışların izahlı lüğəti” təqdim edilmişdir.
Bildirilmişdir ki, Azərbaycan Respublikasının Prezidenti yanında Qeyri Hökumət Təşkilatlarına Dövlət Dəstəyi Şurasının maliyyə yardımı ilə “Sosial İqtisadi Araşdırmalar” İctimai Birliyində hazırlanmış lüğət 373 termin və anlayışı əhatə edir. İzahlı lüğət hazırlanarkən müxtəlif sənədlərdən, lüğətlərdən, eləcə də elmi və praktiki nəşrlərdən, bərk məişət tullantıları üzrə resurslardan istifadə olunmuşdur.
Yeni lüğətin termin müxtəlifliyinin qarşısının alınmasında və vahid terminologiyanın inkişafında faydalı olacağı bildirilmişdir.
Tədbirdə İngiltərənin “EnviroComms” şirkətinin kommunikasiya direktoru Stiven Beyts çıxış edərək tullantıların azaldılmasında strategiyaların və maarifləndirmənin rolundan danışmış, ASC-nin başladığı maarifləndirmə proqramının tullantıların idarəolunması sahəsinin inkişafına təkan verəcəyini xüsusi qeyd etmişdir.
Sonda tədbir iştirakçılarının sualları cavablandırılmış və proqramın uğurlu icrasında media nümayəndələrinin rolu vurğulanmışdır.
Bölmənin digər xəbərləri
