“Təmiz Şəhərim” fotomüsabiqəsi elan edilmişdir
Bakı, 21 fevral (AZƏRTAC). Heydər Əliyev Fondunun təşəbbüsü ilə Qala qəsəbəsi ərazisində “Təmiz Şəhər” ASC tərəfindən reallaşdırılmaqda olan “Təmiz Qala” layihəsi çərçivəsində həyata keçirilən “Təmiz şəhərim” müsabiqəsinin yekunları üzrə fotosərginin rəsmi açılış mərasimi keçirilmişdir.
AZƏRTAC xəbər verir ki, fotomüsabiqənin keçirilməsində əsas məqsəd “yaşıl düşüncə” prinsipini təbliğ etmək, tarixən qədim, lakin müasir şəhərimizin gözəlliyinə və onun qorunub saxlanılmasına gənclərin diqqətini yönəltməkdir.
“Qız Qalası” qalereyasında keçirilmiş tədbiri giriş sözü ilə açan “Təmiz Şəhər” ASC-nin idarə heyətinin sədri Zakir İbrahimov dövlət tərəfindən ekologiyaya və ətraf mühitə diqqətin əhəmiyyətini qeyd etmiş, həmçinin Heydər Əliyev Fondu tərəfindən bu sahənin daim diqqət mərkəzində saxlanıldığını xüsusi vurğulamışdır. Zakir İbrahimov Qala qəsəbəsində Heydər Əliyev Fondunun təşəbbüsü ilə 2010-cu ildən həyata keçirilməkdə olan “Təmiz Qala” tullantıların idarə edilməsi üzrə layihənin əhəmiyyətindən danışmışdır, bu çərçivədə maarifləndirmə tədbirləri barədə məlumat vermişdir. “Təmiz şəhərim” sərgi-müsabiqəsinin də bu silsilə tədbirlərin davamı olduğu diqqətə çatdırılmışdır.
İdarə Heyətinin sədri qədim tarixə, zəngin sərvətlərə malik olan və eyni zamanda, çox gözəl müasir şəhər olan paytaxtımız Bakıda ekoloji tarazlığın qorunmasının vacib olduğunu qeyd edərək tədbirin ətraf mühitin mühafizəsi və insanların şəhərimizin təmiz saxlanılmasına daha böyük qayğı ilə yanaşmalarına təkan olacağına əminliyini bildirmişdir.
Sərgidə paytaxt Bakının gözəl guşələrini tərənnüm edən fotolar ilə yanaşı, insanlar tərəfindən tullantılarla çirklənmiş məkanları əks etdirən şəkillər də nümayiş etdirilir. Sərginin məqsədi əhalini və şəhərimizin qonaqlarını bu gözəlliyi birgə qorumağa səsləməkdir.
Sərgi fevralın 23-dək davam edəcəkdir.
Qeyd edək ki, ötən il noyabrın 20-dən dekabrın 10-dək keçirilmiş fotomüsabiqəyə tullantıların təkrar emalı, yenidən istifadə və ümumiyyətlə, ekoloji mədəniyyətin inkişaf etdirilməsi kimi mövzuları əhatə edən 300-dən çox foto təqdim olunmuşdur. Bu fotoşəkillər arasında münsiflər heyəti tərəfindən 50 fotoşəkil seçilərək sərgilənmək hüququnu qazanmışdır.
Bölmənin digər xəbərləri
