Teylor Sviftin Vyanadakı konsertləri terror təhlükəsi səbəbindən ləğv edilib
Bakı, 8 avqust, AZƏRTAC
Amerikalı pop ulduz Teylor Sviftin Vyanada hər üç konserti ləğv edilib.
AZƏRTAC xəbər verir ki, bu barədə şounun təşkilatçısı “Barracuda Music” avqustun 7-də, çərşənbə günü, axşam saatlarında məlumat verib: “Ernst Happel stadionunda planlaşdırılan terror aktının səlahiyyətli orqanlar tərəfindən təsdiqi ilə əlaqədar hər kəsin təhlükəsizliyi naminə nəzərdə tutulan üç konserti ləğv etməkdən başqa seçimimiz yoxdur”.
Elə həmin gün səhər saatlarında Avstriya polisi terror aktı hazırlamaqda şübhəli bilinən iki nəfərin həbs olunduğunu elan edib. Hüquq-mühafizə orqanlarının nümayəndələrinin sözlərinə görə, saxlanılanların Vyana və onun ətrafında kütləvi tədbirlərdə terror aktı törətmək üçün konkret planları olub.
Teylor Sviftin Vyanada verəcəyi üç konsertdən birincisi cümə axşamı günü keçirilməli idi. Hər konsertə 60 minə yaxın bilet satılmışdı. Təşkilatçı biletlərin pulunu on iş günü ərzində qaytaracağını vəd edib.
Bölmənin digər xəbərləri
