Tokayev: Çin-Avropa tranzit dəhlizinin Qazaxıstan ərazisində ötürücülük qabiliyyəti beş dəfə artacaq
Astana, 2 sentyabr, AZƏRTAC
Qazaxıstan yaxın qonşu və etibarlı tərəfdaş kimi Çinin Sədri Si Cinpinin “Bir kəmər, bir yol” qlobal təşəbbüsünü tam dəstəkləyir və onun həyata keçirilməsində fəal iştirak edir.
AZƏRTAC Akordanın mətbuat xidmətinə istinadla xəbər verir ki, bunu Pekində Qazaxıstan Prezidenti Kasım-Jomart Tokayev Qazaxıstan-Çin İşgüzar Şurasının səkkizinci iclasında çıxışı zamanı deyib.
O qeyd edib: “Çin ilə Avropa arasında bütün kontinental daşımaların 85%-i ölkəmizin payına düşür. Bu il Dostık- Moyıntı dəmir yolu hissəsində ikinci relslərin istifadəyə verilməsi sayəsində Qazaxıstandan keçən Çin-Avropa tranzit dəhlizinin ötürücülük qabiliyyəti 5 dəfə artacaq”.
Dövlət başçısı qeyd edib ki, Qazaxıstan da Trans-Xəzər beynəlxalq nəqliyyat marşrutunun potensialının açılması üçün əlindən gələni edir.
O əlavə edib: “Keçən il bu marşrutla 4,5 milyon ton yük daşınıb ki, bu da bir il əvvəlkinə nisbətdə 62% çoxdur. Biz sürəti artırmağa davam edəcəyik və yaxın gələcəkdə bu rəqəmi 10 milyon tona çatdırmaq vəzifəsini qarşımıza qoyacağıq. Xəzərdəki Aktau və Kurık limanlarımızla daşımaların həcmi durmadan artır. Birgə səylərlə Lianyunqanq limanında Qazaxıstan-Çin logistika terminalı və Sian şəhərində quru liman kimi iri infrastruktur layihələri istifadəyə verilib. Təbii ki, Qazaxıstanın nəqliyyat və tranzit potensialından istifadə Çin şirkətləri üçün böyük imkanlar açır”.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
