TOVUZ RAYONU İCRA HAKİMİYYƏTİNİN BAŞÇISI TOFİQ ZEYNALOVUN ÇIXIŞI
Memarı və qurucusu dahi Heydər Əliyev olan Azərbaycan Respublikası Sizin şəxsi səyiniz, əzmkarlığınız sayəsində müasir inkişaf yoluna qədəm qoymuşdur. Regionların sosial-iqtisadi inkişafına dair Dövlət proqramı bütün respublikada olduğu kimi, rayonumuzda da uğurla icra olunur. Bu gün hər bir tovuzlu müsbət dəyişiklikləri öz gündəlik yaşayışında hiss edir. Hazırda rayonda Qarabağ müharibəsi əlilləri və şəhid ailələri üçün 64 ailəlik iki yaşayış evinin, Tovuzçay su dəryaçasının, Zəyəmçaydan rayona ümumi uzunluğu 52 kilometr olan içməli su xəttinin tikintisi davam edir.
Təhsilin inkişafına göstərdiyiniz qayğının nəticəsi olaraq, rayonda 260 yerlik məktəb binası, 420 yerlik 21 əlavə sinif otaqları tikilib istifadəyə verilmiş, 6 məktəb binası əsaslı şəkildə təmir edilmişdir. Aşağı Ayıblı kəndində 1176 yerlik məktəb binası tikilir. Dövlət proqramına uyğun olaraq, bu il üç kənddə 400, 264 və 360 yerlik məktəb binalarının tikintisinə başlanacaqdır.
Eyni zamanda, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsü ilə “Yeniləşən Azərbaycana yeni məktəb” proqramı çərçivəsində 640 yerlik üç müasir məktəb binası tikilib istifadəyə verilmiş, 720 yerlik üç məktəbin tikintisi də nəzərdə tutulmuşdur. Bu qayğıya görə hörmətli Mehriban xanım Əliyevaya tovuzluların minnətdarlığını çatdırmaq istəyirəm.
Möhtərəm cənab Prezident!
Milli Olimpiya Komitəsinə rəhbərlik etdiyiniz dövrdə ölkəmiz idman sahəsində böyük nailiyyətlər qazanmışdır. Regionlarda müasir olimpiya idman komplekslərinin inşası idmanın inkişafında, gənclərin mənəvi və fiziki baxımından daha sağlam böyüməsində mühüm rol oynamışdır. Rayonumuzun zəngin idman ənənələrini nəzərə alaraq, qısa vaxt ərzində 32 məhəlli idman meydançası istifadəyə verilmişdir və daha 30 meydançanın tikintisi davam etdirilir. Sevindirici haldır ki, bu il 15-16 yaşlılar arasında tovuzlu futbolçular respublika çempionu olmuşlar.
Respublika üzrə 16-cı olan belə möhtəşəm idman kompleksinin rayonumuzda tikintisinə başlanması Gənclər ilində Sizin tovuzlu gənclərə ən dəyərli hədiyyənizdir. Bu qayğıya görə minnətdarlığımızı bildirir və Sizi əmin edirik ki, Tovuzda idman sürətlə inkişaf etdiriləcək, böyük nailiyyətlər əldə olunacaq və sağlam gənclik formalaşacaqdır. Gələcək nəsillərin sağlamlığı üçün regionlarda tikilən diaqnostika mərkəzindən birinin də rayonumuzda nəzərdə tutulması barədə tovuzluların xahişini Sizə çatdırmaq istəyirəm.
Möhtərəm cənab Prezident!
Cəbhə bölgəsində yaşayan tovuzlular Vətənin müdafiəsində mərdliklə dayanmış, bir qarış torpağı düşmənə verməmişlər. Çünki onların arxasında ümummilli lider Heydər Əliyev dayanmışdı. Bu gün Ali baş komandan İlham Əliyevin Azərbaycanın ərazi bütövlüyünün bərpa olunması barədə prinsipial mövqeyini xalqımız kimi, tovuzlular da tam müdafiə edirlər. Müharibənin nə olduğunu yaxşı bilən, ərazi bütövlüyümüz uğrunda döyüşlərdə 335 nəfər şəhid verən, göstərdikləri igidliklərə görə 2 nəfər Milli Qəhrəman adına layiq görülmüş tovuzlular Ali baş komandanın hər bir tapşırığını yerinə yetirməyə hazırdırlar.
Cənab Prezident, ölkədə sahibkarlığın inkişafı üçün yaradılan əlverişli şərait rayonumuzda da özəl sektorun genişlənməsinə, iş adamlarının rayona üz tutmasına, daxili sərmayənin artmasına səbəb olmuşdur. Sizə məruzə etmək istəyirəm ki, rayonun yerli xammalından istifadə etməklə sosial-iqtisadi inkişafın prioritetlərinin müəyyənləşdirilməsi, kartof emalı, konserv, kərpic, sement və mini-şərab zavodlarının tikintisi istiqamətində mühüm layihələrin həyata keçirilməsi nəzərdə tutulur. Tovuz şəhərinin müasir memarlıq simasının yaradılması üçün tədbirlər görülür.
X X X
Bölmənin digər xəbərləri
