İDMAN
TRAMPLİN-TAMBLİNQ ÜZRƏ ÖLKƏ ÇEMPİONATI BAŞA ÇATMIŞDIR
Azərbaycan Gimnastika Federasiyasından AZƏRTAC-ın müxbirinə bildirmişlər ki, kişilər və qadınlar arasında qaliblər çoxnövçülüyün yekunlarına əsasən müəyyən edilmişdir. Kişi idman ustaları arasında salto, vint və qarışıq hərəkətlərin yekunlarına əsasən 25,26 bal toplayan gimnastika məktəbinin nümayəndəsi Rahib Əliyev birinci yerə çıxmışdır. Qadınlar arasında da bu məktəbin nümayəndəsi Ayla Əhmədova qalib gəlmişdir – 28,03 bal. Ustalığa namizədlər arasında Nizami rayonundakı idman məktəbinin yetirməsi Məmməd Hacıyev fərqlənmişdir – 27,13 bal.
Yaş dərəcələri arasında da qaliblər müəyyən edilmişdir. Birinci yaş dərəcəsində Nizami idman məktəbindən Toğrul Rəhmanov daha yaxşı nəticə göstərmişdir - 26,99 bal. İkinci dərəcəli gimnastlar arasında da həmin məktəbin nümayəndələri Fərid Salmanlı (27,46 bal) və Nərminə Miniqurova (27,06 bal) qələbə qazanmışlar. Üçüncü yaş dərəcəsində gimnastika məktəbindən Orxan Bağırov (25,96 bal) və Nizami idman məktəbindən Gülnarə Quluzadə (26,53 bal) qalib elan olunmuşlar.
Gələn il Avropa çempionatına gedəcək yığma komandamızın tərkibi bu yarışların nəticələrinə əsasən müəyyən ediləcəkdir.
Xatırladaq ki, tramplin-tamblinq batut və akrobatika xalçası üzərində hərəkətlərin yerinə yetirildiyi idman növüdür. Bu xalçanın uzunluğu 35, eni isə 1,5 metrdir. Əvvəllər tamblinq akrobatikanın tərkibinə daxil idi, sonralar isə ayrıca idman növü olmuşdur.