“Turan Tovuz”un qapıçısı Premyer Liqada 8 oyundur qol buraxmır
Bakı, 10 mart, AZƏRTAC
“Turan Tovuz”un qapıçısı Sergey Samok Premyer Liqada meydana çıxdığı ardıcıl 8-ci oyunda qapısını toxunulmaz saxlayıb.
AZƏRTAC Peşəkar Futbol Liqasının rəsmi saytına istinadla xəbər verir ki, Azərbaycan Premyer Liqasının XXIII turunun “Neftçi” ilə görüşündə (1:0) etibarlı çıxış edən qolkiper cari mövsüm meydana çıxdığı 6 matçın heç birində qol buraxmayıb.
Samok ötən çempionatın son iki turunda da “quru oyun” keçirib. O, sonuncu dəfə 2024/2025-ci illər mövsümünün XXXIV turunda qol buraxıb.
Rusiyalı qapıçı “Neftçi” ilə 2025-ci il mayın 10-da baş tutan ev matçında (1:2) rəqibin fərqlənməsinə mane ola bilməyib. Həmin görüşdə sonuncu qolu 32-ci dəqiqədə Dembo Darbo vurub. Buraxılan topdan sonra Samok “quru dəqiqə”lərinin sayını 778-ə çatdırıb.
Bölmənin digər xəbərləri
