Türk ekspert: Şuşanın yenidən dirçəlişi əsrlik həsrətin vüsal tapmasıdır
Bakı, 2 sentyabr, AZƏRTAC
Ata yurdumuz, mədəniyyətimizin və ruhumuzun beşiyi olan Şuşanın yenidən dirçəlişinə şahidlik etmək sadəcə bir şəhərsalma uğurunu izləmək deyil, əsrlik bir həsrətin vüsal tapmasıdır.
Bu fikirləri AZƏRTAC-a açıqlamasında Türk Dünyası İnkişaf və İnnovasiya Mərkəzinin rəhbəri Mesut Gülaçtı deyib.
Şuşaya səfəri və şəhərdə aparılan bərpa-quruculuq işləri ilə bağlı təəssüratlarını bölüşən M.Gülaçtı Şuşanın yenidən dirçəlişinin yalnız şəhərsalma uğuru deyil, həm də tarixi həsrətin sona çatması baxımından mühüm əhəmiyyət daşıdığını vurğulayıb.
M.Gülaçtı ailəsinin köklərinin Şuşadan Türkiyəyə, oradan isə Almaniyaya uzanan köç və qürbət hekayəsi ilə bağlı olduğunu vurğulayıb. O, illərdən sonra ata-baba yurdu Şuşaya qayıtmasının onun üçün xüsusi məna daşıdığını bildirib: “Ailəmizin kökləri bu qədim torpaqlardan - Şuşadan boy verib Türkiyəyə, oradan da Almaniyaya uzanan uzun bir köç və qürbət hekayəsinə çevrilmişdi. İllər sürən ayrılıqdan sonra bu müqəddəs torpaqlara qədəm basmaq, ata-baba yurdu Şuşanın havasını udmaq mənə, Mesut Gülaçtıya qismət oldu”.
Mərkəz rəhbəri Şuşada aparılan bərpa və quruculuq işlərinin şəhərin tarixi kimliyinin qorunması ilə müasir şəhərsalma yanaşmalarını bir araya gətirdiyini diqqətə çatdırıb. Onun sözlərinə görə, şəhərdə həyatın yenidən canlanması xüsusi əhəmiyyət daşıyır.
“Beynəlxalq ekspertlərin də yerində heyranlıqla qeyd etdiyi kimi, Şuşa bu gün yalnız daş binaları ilə deyil, ruhu, uşaq səsləri və küçələrindəki canlı həyatı ilə yenidən ayağa qalxır. Qarabağ küçəsinin yerli təbii daşlarla toxunan müasir görkəmində, “15 dəqiqəlik şəhər” konsepsiyası və innovativ yanaşmalarla inşa edilən məhəllələrində həyatın yenidən canlanması Türk dünyasının ortaq gələcəyi və inkişafı adına böyük bir qürur mənbəyidir”, – deyə M.Gülaçtı bildirib.
O Şuşanın dirçəlişini mümkün edən şəhidlərin xatirəsini ehtiramla yad edib, qazilərə minnətdarlığını ifadə edib.
Ekspert Qarabağın azadlığı və Şuşanın yenidən qurulması prosesinə rəhbərlik edən Azərbaycan Prezidenti İlham Əliyevə, eləcə də bu istiqamətdə fəaliyyət göstərən qurumlara və soydaşlarına təşəkkürünü bildirib: “Qarabağın azadlığı və Şuşanın tarixi kimliyi qorunaraq müasir şəhərsalma vizyonu ilə yenidən qurulması prosesinə qətiyyətlə rəhbərlik edən başda Azərbaycan Prezidenti İlham Əliyev olmaqla, əməyi keçən bütün qurumlara və soydaşlarımıza dərin təşəkkürümü bildirirəm”.
M.Gülaçtı Şuşanın gələcəkdə də Türk dünyasının mühüm simvollarından biri olaraq qalacağına əminliyini ifadə edib: “Ata torpağımız Şuşa əbədiyyən Türk dünyasının parlayan ulduzu və ilham mənbəyi olaraq qalacaq”.
Müxbir – Pərvanə Qafarova
Bölmənin digər xəbərləri
