Türkiyə İranla sərhəddə çəkilən divarı tamamlayır
Ankara, 29 iyul, AZƏRTAC
Türkiyə İran sərhədi boyunca modul divar sistemini genişləndirir, bölgədə qaçaqmalçılığı və qanunsuz miqrasiyanı minimuma endirməyə çalışır.
AZƏRTAC xəbər verir ki, 2021-ci ildən bəri Türkiyə-İran sərhədi boyunca planlaşdırılan 305 kilometrlik beton və polad divarların 235 kilometri artıq inşa edilib. Son 70 kilometrlik hissədə işlər dağlıq Başkale bölgəsində davam edir.
Sərhədin daha 6 kilometrlik hissəsi müasir ərazi monitorinq sistemlərindən istifadə etməklə Van əyalətinin şərqindəki Başkale şəhərində qurulub. Beş metr hündürlüyündə divarın üzərinə 90 santimetr hündürlükdə olan tikanlı məftildən hasar çəkilib.
Türkiyə Silahlı Qüvvələrinin sərhəd bölmələri pilotsuz uçuş aparatlarından və məsafədən idarəolunan muxtar yerüstü nəqliyyat vasitələrindən istifadə edərək ərazini gecə-gündüz izləməyə davam edir. Burada zirehli nəqliyyat vasitələri və dronəleyhinə sistemlər də yerləşdirilib.
Snayper dəstələri və xüsusi təyinatlı qüvvələrin bölmələri vacib yerlərdə yerləşdirilib.
Bölmənin digər xəbərləri
