TÜRKİYƏDƏ ƏLVERİŞSİZ HAVA ŞƏRAİTİ DAVAM EDİR

05.01.2004 [22:44]
Çap et
A⁺ A^-

AZƏRTAC-ın xüsusi müxbiri xəbər verir ki, yanvarın 4-dən Türkiyənin bütün ərazisində əlverişsiz hava şəraiti davam edir. Mərmərə dənizindəki güclü tufanla əlaqədar İstanbuldakı sərnişin gəmilərinin hərəkəti müvəqqəti dayandırılmışdır. Ədrinə vilayətində avtomobil magistralı buz bağlamışdır. Qırıqqala vilayətində qar örtüyünün qalınlığı 10, bəzi yerlərdə isə 25 santimetrə çatmışdır.

Mərmərə dənizindəki tufan nəticəsində 26 gəminin Bosfor və Dardanel boğazlarından keçməsi təxirə salınmışdır. Bingöl vilayətində orta məktəblər müvəqqəti olaraq bağlanmış, 227 kənd və qəsəbə ilə əlaqə kəsilmişdir. Şəhərdə qar örtüyünün qalınlığı 28, dağlıq yerlərdə 60 santimetrə çatmışdır.

Türkiyə meteoroloqlarının məlumatına görə, ölkə ərazisində əlverişsiz hava şəraiti bir neçə gün davam edəcəkdir.