TÜRKİYƏDƏ HOCA NƏSRƏDDİN GÖLÜ YOX OLMAQ TƏHLÜKƏSİ QARŞISINDADIR
Hər il bütün dünyadan bu hazırcavab və müdrik folklor qəhrəmanının pərəstişkarları onun şərəfinə gölün sahilində keçirilən festivala toplaşırlar. İndiki nəfəskəsən isti yayda isə göl yoxa çıxmışdır və onun quraqlıqdan çat-çat olmuş dibində adamlar piyada gəzişirlər.
Bəs səbəb nədir? İndi əfsanəvi Hoca nə edəcək? Axı, ənənəyə əsasən, o, hər il gölün sahilinə gələr və heybəsindən yoğurt çıxararaq, onu su ilə qarışdırardı. Bunu görən türklər və qonaqlar Hocanı əhatəyə alar və nə etdiyini heyrətlə soruşardılar. Nəsrəddin də cavab verərdi: “Nə edirəm? Görürsünüz ki, gölə maya vurub onu qıcqırdıram”. Kimsə bununla sanki razılaşmayaraq deyərdi: “Yox, əziz Hoca, bir şey edə bilməyəcəksən. Axı, bu, sudur”. Hoca təmkinini pozmadan cavab verərdi: “Mən də bilirəm, su olmağına sudur. Lakin bir baxın, suyun ətrafına nə qədər adam toplaşıb, deməli, hamınız möcüzə gözləyirsiniz - birdən göl qıcqırdı, birdən süd çayları axmağa başladı”.
Türkiyə ekoloqları təbii mədəni sərvəti xilas etmək, gölün qurumasının səbəblərini öyrənmək üçün Akşehirə gəlmişlər. Onlar müəyyən etmişlər ki, gölün qurumasının baiskarları şəhər sakinlərinin özləridir. Onlar əkinlərini, həyət-bacalarını Hoca Nəsrəddin gölünün suyu ilə gen-bol suvarırlarmış. Nəticədə son 10 ildə gölün səthi 10 dəfə - 35 kvadratkilometrədək kiçilmişdir. Göl təkcə yazda su ilə az-çox dolmağa başlayır, o da ki yağış yağsa. Bu il yağış suları 47-ci Hoca Nəsrəddin bayramını keçirməyə güc-bəla kifayət etmişdir.
Bölmənin digər xəbərləri
