Türkiyənin xarici işlər naziri Rusiyaya işgüzar səfər edəcək
Moskva, 24 dekabr, AZƏRTAC
Türkiyənin xarici işlər naziri Mövlud Çavuşoğlu dekabrın 29-da Rusiyaya işgüzar səfər edəcək.
AZƏRTAC xəbər verir ki, bunu Rusiya Xarici İşlər Nazirliyinin rəsmi nümayəndəsi Mariya Zaxarova Moskvada keçirilən brifinqdə bildirib.
O qeyd edib ki, Mövlud Çavuşoğlu Soçidə rusiyalı həmkarı Sergey Lavrovla görüşəcək. Həmin gün Rusiya-Türkiyə Yüksək Səviyyəli Əməkdaşlıq Şurası çərçivəsində fəaliyyət göstərən strateji planlaşdırma qrupunun iclası keçiriləcək.
Tərəflər Azərbaycan, Rusiya, Ermənistan rəhbərlərinin noyabrın 9-da imzaladıqları Bəyanatın müddəalarının həyata keçirilməsi ilə bağlı məsələləri müzakirə edəcəklər. Rusiya-Türkiyə Birgə Monitorinq Mərkəzinin fəaliyyətinin qurulması məsələləri barədə də fikir mübadiləsi aparılacaq.
Görüşlərdə, həmçinin Yaxın Şərqdə, Cənubi Qafqazda, Mərkəzi Asiyada, Ukraynada və Qara dəniz hövzəsində vəziyyət nəzərdən keçiriləcək.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
