Türkiyənin xarici işlər naziri Ukraynaya səfər edəcək
İstanbul, 15 iyul, AZƏRTAC
Türkiyənin xarici işlər naziri Hakan Fidan bu gün Ukraynaya səfər edəcək.
AZƏRTAC xəbər verir ki, bu barədə Türkiyənin Xarici İşlər Nazirliyi (XİN) məlumat yayıb.
Məlumatda qeyd edilib ki, səfər çərçivəsində Hakan Fidanın Ukrayna Prezidenti Volodimir Zelenski tərəfindən qəbul edilməsi, həmçinin ukraynalı həmkarı Andrey Sibiqa, eləcə də Prezident Aparatının rəhbəri Kiril Budanov, Ukrayna Milli Təhlükəsizlik və Müdafiə Şurasının rəhbəri Rüstəm Umerov, Krım tatarlarının milli lideri, Ukrayna Ali Radasının deputatı Mustafa Abdülcəmil Kırımoğlu, Krım Tatar Milli Məclisinin sədri Refat Çubarov daxil olmaqla bir sıra yüksəksəviyyəli rəsmilərlə görüşlər keçirməsi planlaşdırılır.
Nazir Fidanın keçirəcəyi görüşlərdə Türkiyə–Ukrayna münasibətləri, Ukraynada ədalətli və davamlı sülhün təmin olunması istiqamətində atılan diplomatik səylərin davam etdirilməsinin, eləcə də bu müharibənin Qara dənizə yayılmamasının vacibliyi, Türkiyənin Qara dənizin sülh, sabitlik və əməkdaşlıq hövzəsi kimi qorunub saxlanılması məqsədilə diplomatik təşəbbüsləri, eləcə də ölkəsinin Ukraynanın müstəqilliyinə, suverenliyinə və ərazi bütövlüyünə verdiyi dəstəyin, Ukraynaya müxtəlif sahələrdə və beynəlxalq platformalarda göstərilən yardımlara toxunması gözlənir.
Qeyd edək ki, Türkiyə ilə Ukrayna arasında 2022-ci il fevralın 3-də imzalanan Sərbəst Ticarət Sazişi (STS) dünən Ukrayna Parlamenti tərəfindən ratifikasiya edilib.
Sazişin Ukrayna Prezidenti Volodimir Zelenskinin imzasından sonra qüvvəyə minəcəyi gözlənilir.
Dörd ildir ratifikasiyası gözlənilən bu sənədin türk ixracatçılarının Ukrayna bazarında Avropa İttifaqı ixracatçıları ilə bənzər rəqabət şəraitinə malik olmasına, eləcə də Türkiyə–Ukrayna iqtisadi və ticarət əlaqələrinin daha da inkişaf edərək 10 milyard ABŞ dolları həcmində ticarət dövriyyəsi hədəfinə çatmasına töhfə verəcəyi gözlənilir.
Türkiyə ilə Ukrayna arasında 2024-cü ildə 6,2 milyard ABŞ dolları təşkil edən ikitərəfli ticarət dövriyyəsi 2025-ci ildə 6,6 milyard ABŞ dollarına yüksəlib.
Xatırladaq ki, Hakan Fidan Ukraynaya sonuncu dəfə ötən ilin may ayında səfər edib.
Ukraynadan Türkiyəyə xarici işlər naziri səviyyəsində son səfər isə bu il iyulun 7-də NATO Zirvəsi münasibətilə baş tutub.
Bölmənin digər xəbərləri
