Türkmənistanın daimi bitərəfliyinin əhəmiyyəti videokonfrans formatında beynəlxalq mediaforumda müzakirə edilib
Bakı, 17 aprel, AZƏRTAC
Türkmənistan Xarici İşlər Nazirliyinin binasında Türkmənistanın daimi bitərəfliyinin 25 illiyinə həsr edilmiş videokonfrans formatında beynəlxalq mediaforum keçirilib.
AZƏRTAC Türkmənistan Xarici İşlər Nazirliyinin mətbuat xidmətinə istinadla xəbər verir ki, media-forumun işində Türkmənistanın bir sıra nazirlik və idarələrinin rəhbərləri və nümayəndələri, Türkmənistanın bir sıra ali məktəblərinin professor-müəllimlər heyətinin üzvləri, yerli KİV təmsilçiləri, elm xadimləri, ekspertlər, həmçinin bir sıra, o cümlədən AZƏRTAC, TASS, Anadolu, Kazinform və başqa informasiya agentliklərinin və nəşrlərin rəhbərləri və nümayəndələri iştirak ediblər.
Tədbirdə məşhur xarici ali məktəblərin rektorları və professorları, nüfuzlu xarici ictimai təşkilatların rəhbərləri və dünyanın 20-dən çox ölkəsini təmsil edən informasiya agentliklərinin 50-dən çox müxbiri iştirak edirdilər.
Media-forumun açılışında Prezident Qurbanqulu Berdiməhəmmədovun rəhbərliyi altında keçirilən Türkmənistanın daimi bitərəfliyi siyasətinin əhəmiyyəti qeyd edilib.
Forum iştirakçılarının çıxışlarında Türkmənistanın humanist dəyərlərin irəliləyişinə, yalnız dinc və konstruktiv dialoq yolu ilə dünyada tərəqqiyə nail olmağa yönəlmiş pozitiv bitərəflik statusunun əhəmiyyəti vurğulanıb. Media-forum çərçivəsində Türkmənistanda həyata keçirilən, zamanın sınağından çıxmış bitərəflik siyasətinin uğurlarından bəhs edən videoçarx nümayiş olunub.
TASS informasiya agentliyinin baş direktorunun müavini A.Kopnov deydib: “Türkmənistanın bitərəfliyi region ölkələri və dünya dövlətləri arasında dostluğun və qarşılıqlı faydalı əlaqələrin inkişafı üçün yaxşı təməldir. Türkmənistanın daimi bitərəfliyi onun xalqının başqa ölkələrlə sülhü və mehriban qonşuluq münasibətlərini qoruyub saxlamaq əzmini əks etdirir”.
Niderlandın demokratikləşmə və təhlükəsizlik sektorunda islahatlar məsələləri üzrə müstəqil məsləhətçi, iqtisad elmləri doktoru, professor S.Faltas çıxışında məxsusi qeyd edib ki, Türkmənistan pozitiv bitərəfliyi özünün mehriban qonşuluq və qarşılıqlı hörmət prinsipləri əsasında reallaşan xarici siyasəti ilə uğurlu şəkildə birləşdirir.
Tarix elmləri doktoru, Belarus Dövlət Universitetinin beynəlxalq münasibətlər fakültəsinin dekanı V.Şadurski öz çıxışında dünya xalqları və ölkələri arasında qarşılıqlı faydalı dostluq münasibətlərinin möhkəmlənməsi və genişlənməsi kontekstində Türkmənistanın bitərəfliyinin xüsusi əhəmiyyətini vurğulayıb.
Qazaxıstan Respublikasının Ş.Yesenov adına Kaspiysk Dövlət Texnologiya və Mühəndislik Universitetinin rektoru B.Axmetov Türkmənistanın daimi bitərəfliyi təsisatının əsas istiqamətlərini konkretləşdirərək deyib: “Qazaxıstan Türkmənistana dost ölkə kimi, bitərəflik siyasətini dəstəkləyir və onun müstəqil seçilmiş inkişaf yoluna hörmət edir”.
Tədbirin iştirakçıları Türkmənistanın bitərəfliyi məsələləri üzrə “sual - cavab” formatında fikir mübadiləsi aparıblar. Sonda bütün iştirakçılar cari ilin dekabr ayında Aşqabadda keçirilməsi nəzərdə tutulan “Bitərəflik siyasəti və beynəlxalq sülhün, təhlükəsizliyin və davamlı inkişafın təmin olunmasında onun rolu” mövzusunda beynəlxalq konfransa dəvət ediliblər.
Bölmənin digər xəbərləri
