TÜRKPA və Parlamentlərarası İttifaq arasında əməkdaşlıq perspektivləri müzakirə olunub
Bakı, 21 oktyabr, AZƏRTAC
Oktyabrın 21-də İsveçrənin Cenevrə şəhərində TÜRKPA-nın Baş katibi səfir Ramil Həsən Parlamentlərarası İttifaqın (PAİ) 151-ci Assambleyası çərçivəsində İttifaqın Baş katibi Martin Çunqonq ilə görüşüb.
TÜRKPA-dan AZƏRTAC-a bildirilib ki, M.Çunqonq Baş katib Ramil Həsəni vəzifələrinin icrasına başlaması münasibətilə təbrik edib və ona fəaliyyətində davamlı uğurlar arzulayıb.
Ramil Həsən PAİ-nin Baş katibinə xoş sözləri üçün minnətdarlığını bildirərək, əməkdaşlıq perspektivləri və iki qurum arasındakı əlaqələrin daha da gücləndirilməsi ilə bağlı fikirlərini səsləndirib. O, PAİ-nin Katibliyinin geniş təcrübəsini nəzərə alaraq, TÜRKPA Beynəlxalq Katibliyinin əməkdaşlarının İttifaqda qısamüddətli peşəkar təlim proqramında iştirak imkanlarına baxılmasını təklif edib.
M.Çunqonq bu təklifi məmnuniyyətlə qarşılayıb və qurumlar arasındakı ikitərəfli əməkdaşlığın bütün istiqamətlərinə dəstək verməyə hər zaman hazır olduğunu bildirib. O, həmçinin Qırğızıstanın PAİ-nin fəaliyyətində fəal iştirakının təmin edilməsi istiqamətində TÜRKPA-nın dəstəyinin əhəmiyyətini qeyd edib.
Görüşdə tərəflər qarşılıqlı maraq doğuran məsələlər üzrə fikir mübadiləsi aparıb, parlamentlərarası əməkdaşlığın gücləndirilməsi, parlament diplomatiyası sahəsində təcrübə mübadiləsi və iki qurum arasındakı dialoqun inkişaf etdirilməsi məsələlərinə diqqət yetirib.
Bölmənin digər xəbərləri
