Ukrayna 130 hərbçisini əsirlikdən geri qaytarıb
Kiyev, 16 aprel, AZƏRTAC
Pasxa bayramında Ukrayna və Rusiya arasında əsirlərin növbəti mübadiləsi həyata keçirilib. Mübadilə nəticəsində 130 ukraynalı hərbçi əsirlikdən azad edilib.
AZƏRTAC xəbər verir ki, bu barədə Ukrayna Prezidenti Ofisinin rəhbəri Andrey Yermak məlumat verib.
Onun sözlərinə görə, hərbçilər, sərhədçilər, milli qvardiyaçılar, dənizçilər, Dövlət Xüsusi Nəqliyyat Xidmətinin əməkdaşları Vətənə qaytarılıb. Mübadilə bir neçə mərhələdə baş tutub.
“Baxmut, Soledar, Zaporojye, Xerson istiqamətlərində əsir düşən sıravi əsgər və çavuşlar azad edilib”, - deyə A.Yermak bildirib.
Azad edilən əsgərlər arasında 48-i itkin düşmüş sayılırdı. Xilas edilənlərdən bəziləri yaralıdır. Baxmut şəhəri ərazisində döyüşmüş iki qardaş da əsirlikdən azad edilib. Azadlığa buraxılan müdafiəçilərin ən böyüyünün 58, ən kiçiyinin 21 yaşı var.
Müharibənin başlanmasından sonuncu mübadiləyə qədər artıq 2017 ukraynalı əsirlikdən azad edilib.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
