Ukrayna-Azərbaycan əlaqələri güclü siyasi təməllər üzərində formalaşıb ŞƏRH
Bakı, 27 aprel, AZƏRTAC
Dünyada gedən mürəkkəb geosiyasi proseslər, hərbi münaqişələr və qarşıdurmalar fonunda müharibələrin humanitar aspekti getdikcə öz aktuallığını artırır. Bu baxımdan Ukrayna Prezidentinin Azərbaycana son səfərini və iki ölkə arasında olan əlaqələri məhz humanitar aspektdən xarakterizə etmək yerinə düşər. Ukraynada müharibə başlayan ilk gündən Azərbaycan Ukraynaya humanitar yardım göstərir. Ukraynanın elektrik və enerji təchizatı, müharibədə travma yaşayan ailələrin uşaqlarına reabilitasiya dəstəyi, bu ölkəyə göndərilən humanitar yardım və karvanlar bu qəbildən olan dəstəklərindəndir. Əlbəttə, Ukrayna və Azərbaycan əlaqələri güclü siyasi təməllər üzərində formalaşıb, hər iki xalq və dövlət arasında hər zaman yüksək əlaqələr mövcud olub. Azərbaycan və Ukrayna bir-birinin ərazi bütövlüyünü və suverenliyini tanıyıb, son illərdə iki ölkənin liderləri arasında geniş təmaslar və məsləhətləşmələr həyata keçirilib. Ukraynada böyük sayda Azərbaycan diasporu fəaliyyət göstərir ki, bu, xalqlar arasında geniş mədəni əlaqələrin göstəricilərindən hesab olunur.
Bunu AZƏRTAC-a açıqlamasında “Azərbaycan-Amerika Gəncləri” İctimai Birliyinin sədri Vüqar Əhmədov deyib.
Onun sözlərinə görə, ölkələrimiz arasında iqtisadi-ticari əlaqələr də geniş sahələri əhatə edir. Azərbaycan öz növbəsində uzun illər müharibə və humanitar fəlakətlə üzləşib, xalqımız böyük acılar yaşayıb. Müharibənin ağrı və acılarını öz üzərində yaşamış bir ölkə kimi Azərbaycan məhz bu səbəbdən müharibə və münaqişələrə hər zaman insani və humanitar aspektdən yanaşır. Təkcə Ukrayna ilə kifayətlənməyərək, bölgəmizdə baş verən son ABŞ-İsrail-İran müharibəsində də Azərbaycan humanitar sahədə böyük fəallıq nümayiş etdirib, İrandan təxliyə prosesini təşkil edib, eyni zamanda, müharibədən əziyyət çəkən insanlara yardım göndərib.
QHT sədri bildirib ki, bu addımlar Azərbaycanın sülhpərvər siyasət həyata keçirdiyini və bölgədə sülhə, sabitliyə xidmət etdiyini bir daha dünyaya nümayiş etdirir. Azərbaycan Qarabağ və Şərqi Zəngəzurda genişmiqyaslı bərpa-quruculuq və minatəmizləmə işləri aparmaqla yanaşı, bu sahədə Ukraynaya da yardım göstərir, öz təcrübəsini və məsləhətlərini bölüşür.
Vüqar Əhmədovun sözlərinə görə, Ukraynada müharibə başa çatdıqdan sonra minatəmizləmə, humanitar tədbirlər, eləcə də yenidənqurma və bərpa işlərinə böyük ehtiyac yaranacaq. Azərbaycan isə bu istiqamətdə zəngin təcrübəyə malikdir və həm texniki avadanlıqlar, həm də praktiki biliklər baxımından Ukraynaya dəstək verir.
O vurğulayıb ki, müharibələrin ən gərgin mərhələlərində belə humanitar məsələlər daim diqqət mərkəzində olmalıdır. Azərbaycan da indiyədək insanlararası münasibətlərin inkişafına, humanitar dəstəyə və sülh quruculuğuna hər zaman öz töhfəsini verib.
Bölmənin digər xəbərləri
