UKRAYNA PREZİDENTİ VİKTOR YUŞŞENKONUN BƏYANATI
- Hörmətli İlham Heydər oğlu!
Əziz azərbaycanlı dostlarımız!
Ukrayna nümayəndə heyəti adından sizin hamınızı Ukrayna torpağında salamlamaq istəyirik.
Biz geniş tərkibdə danışıqlar apardıq, ikitərəfli münasibətlərlə bağlı məsələləri müzakirə etdik. Bəri başdan demək istərdim ki, bizim münasibətlərimiz üçün çox yaxşı dinamika səciyyəvidir. Biz həm siyasi, diplomatik, həm də ticarət, iqtisadi məsələləri nəzərdə tuturuq. Münasibətlərimizin həm insani səviyyədə, həm də dövlət səviyyəsində yaxşı dinamikaya malik olması üçün son illərdə həqiqətən çox iş görmüşük. Bu gün deyə bilərik ki, belə dinamikaya nail olmuşuq. Mən çıxışımda bu barədə bir neçə kəlmə və statistik rəqəm deyəcəyəm.
İkincisi, bu münasibətlərin statusunu inkişaf etdirmək çox vacibdir. Bu gün imzaladığımız iki mühüm sənəd bu münasibətlərin statusunu artırır. İndən belə bizim münasibətlərimiz strateji xarakter daşıyır, bu gün imzaladığımız Bəyannamə də buna sübutdur. Bu gün biz Prezidentlər Şurasının Nizamnaməsini imzaladıq. Beləliklə, münasibətlərimizi əlaqələndirən və onların inkişafını ən yüksək səviyyədə təmin edən yeni təsisat fəaliyyətə başlamışdır.
İqtisadi əlaqələrimizin inkişafı bizi qane edir. Bununla əlaqədar iki rəqəm göstərmək istəyirəm. Keçən il qarşılıqlı ticarətimizin həcmi 43 faiz artmışdır. Bu, çox yaxşı dinamikadır. Ticarət dövriyyəsinin Ukraynaya aid hissəsinə gəldikdə, ixrac 50 faiz artmışdır. Bu da çox vacibdir ki, ixracın 24 faizi maşınqayırmanın payına düşür. Milli iqtisadiyyatın əsas sektorları olan kənd təsərrüfatı, metallurgiya, kimya sahələri ticarət dövriyyəsində çox ciddi, dinamik şəkildə təmsil olunmuşdur. Biz bu gün nəqliyyat, rabitə və kosmos sahəsində əməkdaşlığın inkişaf etdirilməsi barədə də danışdıq.
Bununla əlaqədar bir məqamı qeyd etmək xüsusən vacibdir ki, gələcəkdə - Azərbaycanın peykinin buraxılması məsələsi gündəliyə gələndə Ukrayna raketlərindən istifadə edilməsi nəzərdən keçirilir. Bu layihə 2010-cu il üçün planlaşdırılır və belə bir qərara gəlməyimiz bizim üçün çox mühümdür. Biz energetikanın inkişaf perspektivləri barədə danışdıq. Bu, danışıqlar prosesinin ayrıca mövzusudur.
Biz onu əsas götürürük ki, sabah Ukraynada işə başlayacaq enerji sammiti energetika sahəsində münasibətlər siyasətinin optimallaşdırılmasına imkan verən bir tədbir olacaqdır. İkitərəfli münasibətlərə gəldikdə, Xəzərdən çıxarılan Azərbaycan neftinin Avropa İttifaqı ölkələrinə çatdırılması layihəsinin həyata keçirilməsi bizim üçün çox vacibdir. Buna görə də biz bu gün Odessa-Brodı-Avropa İttifaqı marşrutu barədə, boru kəmərinin neftlə doldurulması texnologiyasından tutmuş, onun istismarının başlanmasına qədər bütün məsələlər barədə ətraflı söhbət etdik. Birgə işçi qrup artıq fəaliyyətdədir, iyulun 1-də bu qrupun ilk hesabatı alınacaq və elə həmin gün biz cənab Prezidentlə görüşərək, bu istiqamətdə layihələrin inkişafını qiymətləndirəcəyik.
Biz ikitərəfli münasibətlərdə nəqliyyat və rabitə sahəsində əməkdaşlığın inkişafına böyük əhəmiyyət veririk. Bu gün biz həmin məsələ ilə bağlı bəzi layihələri müzakirə etdik.
Humanitar sahə. Azərbaycan Respublikasında Ukrayna səfirliyi binasının tikilməsi üçün ərazi ayrılmasına görə biz cənab Prezidentə və Azərbaycan hökumətinə minnətdarıq. Yaxın vaxtlarda Ukrayna adından Bakıda Taras Qriqoryeviç Şevçenkonun abidəsinin açılması imkanına görə təşəkkür edirik. Bu gün biz sentyabr və ya oktyabr aylarında Azərbaycanda Ukrayna mədəniyyəti günləri keçirilməsi barədə də söhbət etdik. Onu da deyim ki, bu tədbirlər qarşılıqlı əsasda keçiriləcəkdir.
Biz ikitərəfli münasibətlərimizlə bağlı bir çox başqa sahələrə - təhsil, mədəniyyət, hərbi-texniki əməkdaşlıq sahələrinə dair layihələr barədə danışdıq.
Son olaraq demək istərdim ki, dövlətlərimiz, hökumətlərimiz, ictimai təşkilatlar, biznes strukturları səviyyəsində münasibətləri çox yüksək qiymətləndiririk və bu münasibətlərdə müşahidə olunan dinamika, yuxarıda qeyd etdiyim status bir faktı nümayiş etdirir - hazırda Ukrayna ilə Azərbaycan arasında münasibətlər həqiqətən dostluq münasibətləri və strateji dövlətlərarası münasibətlərdir. Bu, bizim böyük uğurumuzdur. Mən bu münasibətlərin şəxsən təşkilinə, öz hökuməti ilə birlikdə bu münasibətlərin inkişafına verdiyi töhfəyə görə İlham Heydər oğluna təşəkkür etmək istərdim. Biz əminik ki, bu uğurların qazanılmasında həm dövlətlərarası, həm də şəxsi münasibətlərin rolu böyükdür. Demək istəyirəm ki, biz bunu çox yüksək qiymətləndirir və onun qədrini bilirik.
Sağ olun. Ukraynaya xoş gəlmisiniz.
Bölmənin digər xəbərləri
