Ukrayna və İran xarici işlər nazirləri arasında telefon danışığı olub
Kiyev, 28 iyul, AZƏRTAC
Ukrayna İranın mümkün zərbələrlə bağlı açıqlamalarına diplomatik kanallar vasitəsilə cavab verərək vəziyyətin daha da gərginləşməsinin qarşısının alınmasının vacibliyini vurğulayıb.
AZƏRTAC xəbər verir ki, bu barədə Ukraynanın xarici işlər naziri Andrey Sibiqa sosial şəbəkə hesabında paylaşım edib.
Nazirin sözlərinə görə, o, İranın xarici işlər naziri Abbas Araqçi ilə səmimi telefon danışığı aparıb. Sibiqa bildirib ki, ən çətin vəziyyətlərdə belə diplomatiya birbaşa dialoq üçün mühüm vasitə olaraq qalır və Ukraynanın əsas məqsədi gərginliyin daha da artmasının qarşısını almaqdır.
Sibiqa bir daha vurğulayıb ki, Ukraynanın bütün hərəkətləri yalnız Rusiya təcavüzünə qarşı müdafiəyə yönəlib.
"Bir daha vurğuladım ki, Ukraynanın bütün hərəkətləri yalnız ölkəmizi Rusiya təcavüzündən qorumağa yönəlib və heç vaxt mülki gəmilərə və ya mülki şəxslərə qarşı istiqamətlənməyib", – deyə Sibiqa qeyd edib.
Bundan əlavə, Ukraynanın xarici işlər naziri İran gəmisinin son insident zamanı zərər görməsi ilə bağlı məsələyə də münasibət bildirib.
"Məqsədimiz bütün hadisələrin əsas səbəbi olan Rusiya təcavüzünə qarşı mübarizə aparmaqdır. Bütün təxribatlara və itkilərə görə tam məsuliyyət Rusiyanın üzərinə düşür", – deyə Sibiqa vurğulayıb.
Telefon danışığı zamanı nazir İranı eskalasiyaya səbəb ola biləcək hər hansı addımdan çəkinməyə və Rusiyanın Ukraynaya qarşı apardığı müharibəyə dəstəyini dayandırmağa çağırıb.
"Bu müharibə qanunsuzdur və başa çatmalıdır. Mövqeyimiz dəyişməz olaraq qalır: Avropa və Yaxın Şərq sabitliyə, təhlükəsizliyə və sülhə layiqdir", – deyə Ukraynanın xarici işlər naziri bildirib.
Bölmənin digər xəbərləri
