Ukraynada aprelin ortalarında COVID-19-a yoluxanların sayının pik həddə çatacağı gözlənilir
Kiyev, 10 aprel, AZƏRTAC
Ukraynanın Səhiyyə Nazirliyi aprelin ortalarında ölkədə koronavirusa yoluxanların sayının pik həddə çatacağını proqnozlaşdırıb.
AZƏRTAC yerli KİV-lərə istinadla xəbər verir ki, bu barədə Ukraynanın səhiyyə naziri Maksim Stepanov “Pravo na vladu” adlı tok-şouda bildirib.
O deyib ki, Səhiyyə Nazirliyinin proqnozlarına görə, Ukraynada çox gərgin dövr başlayır. Ölkədə xəstələrin sayının xeyli artması müşahidə olunur. “Epidemiyanın necə inkişaf etməsi baxımından qarşıdakı daha bir həftə ərzində yoluxanların sayının 25-30 min artacağını düşünürük”, - deyə nazir söyləyib.
Səhiyyə naziri daha sonra söyləyib ki, koronavirusun Britaniya ştammı Ukraynanı “qorxudur”. Nazirin sözlərinə görə, bu ştamm daha yoluxucu, “gənc” olmaqla yanaşı, klinik cəhətdən ağırlaşma ehtimalı da çox yüksəkdir.
Hazırda Ukraynanın 11 regionu epidemiya təhlükəsinin “qırmızı” zonasında yerləşir. Bununla belə, ölkə ərazisində ümumlokdaun rejimi tətbiq edilməyib.
“Worldometers” xidmətinin məlumatlarından göründüyü kimi, aprelin 7-nə olan vəziyyətə görə, Ukrayna COVID-19-dan ölənlərin sayı baxımından Avropada birinci yerə çıxıb.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
