Ukraynada həftə ərzində 41 mindən artıq insan koronavirusa yoluxub
Kiyev, 11 yanvar, AZƏRTAC
Ötən həftə ərzində Ukraynada 41 mindən artıq insan COVID-19-a yoluxub, 15 mindən çox pasiyent xəstəxanalara yerləşdirilib.
AZƏRTAC xəbər verir ki, bu barədə ölkənin Səhiyyə naziri Maksim Stepanov bildirib.
O deyib: “Ötən həftə ərzində 41.063 nəfərin koronavirus xəstəliyinə yoluxması faktı müəyyən edilib”.
Həftə ərzində polimeraz zəncirvari reaksiya metodu ilə 160.927 test aparılıb, COVID-19 diaqnozlu və yaxud bu xəstəliyə yoluxmada şübhəli hesab edilən 15.110 nəfər xəstəxanaya yerləşdirilib, eyni zamanda, 15.882 nəfər sağalaraq evə buraxılıb. Nazir bildirib ki, hazırda xəstəxanalarda COVID-19 diaqnozu təsdiqlənən, yaxud şübhəli hesab edilən 22.188 nəfər müalicə alır.
Yanvarın 11-nə olan vəziyyətə görə, Ukraynada 1.119.314 yoluxma faktı laboratoriya yolu ilə təsdiqlənib, sutka ərzində 4288 yeni yoluxma halı qeydə alınıb.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
