UKRAYNANIN SABİQ BAŞ NAZİRİ 9 İL MÜDDƏTİNƏ AZADLIQDAN MƏHRUM EDİLDİ
Sabiq hökumət başçısı bu cəzanı pulların “yuyulması”na, hədə və fırıldaq yolu ilə pul qoparmağa və dələduzluğa görə almışdır.
Prokurorluq ona 18 il müddətinə həbs cəzası kəsilməsində israrlı idi, müdafiə isə bu müddətin 5 ilədək azaldılmasına çalışırdı.
Lakin, çox güman ki, Lazarenko həbsdə heç 9 il də qalmayacaqdır. Onun vəkili demişdir ki, qəti müddət sonra müəyyən ediləcək, çünki Lazarenkonun ABŞ-da həbsdə keçirdiyi illər nəzərə alınmalıdır.
Lazarenkonun işi üzrə prosesə nöqtə qoyulduğunu söyləmək hələ tezdir. Belə ki, onun əmlakının və qanunsuz yolla əldə etdiyi maliyyə vəsaitinin müsadirə olunması haqqında ABŞ hökumətinin və bir neçə özəl şirkətin irəli sürdükləri iddialara yaxın vaxtlarda baxılacaqdır.
Lazarenko Ukrayna hökumətinə 1996-97-ci illərdə başçılıq etmişdir. Qətl məqsədi ilə ona dəfələrlə sui-qəsd törədildiyinə istinad edərək, 1999-cu ildə ABŞ-da siyasi sığınacaq istəmiş, lakin həmin ilin fevralında ABŞ hakimiyyət orqanları sığınacaq əvəzinə, onun həbs olunması üçün order vermişlər. Beləliklə, o, məhkəmənin başlanmasını təxminən 4 il həbsxanada gözləmişdir. 2003-cü ilin iyununda 86 milyon dollar girov qoyaraq, azadlığa buraxılmış, 2004-cü ilin fevralında San-Fransiskoda onun işi üzrə məhkəmə başlanmışdır.
Sabiq baş nazir hələlik ev dustağıdır.
Bu proses KİV-lərin böyük marağına səbəb olmuşdur. Çünki Pavel Lazarenko Panamanın keçmiş müdafiə naziri Manuel Noryeqanın vaxtından bəri ABŞ-da həbs cəzasına məhkum edilən ilk belə yüksək vəzifəli dövlət məmurudur.
Bölmənin digər xəbərləri
