Ulduz Əsgərova: Azərbaycan mədəniyyətinin Rusiyada tanıdılması bizim əsas məqsədlərimizdəndir
Moskva, 24 iyun, AZƏRTAC
Moskvada fəaliyyət göstərən “Dostluq-Drujba” Mədəni və Maarifləndirici Tədbirlərə Dəstək və Təşkilat Mərkəzinin rəhbəri Ulduz Əsgərova Azərbaycan mədəniyyətinin, milli dəyərlərinin və ənənələrinin Rusiyada tanıdılması istiqamətində müxtəlif layihələr həyata keçirir. Mərkəzin nəzdində fəaliyyət göstərən yaradıcı kollektivlər vasitəsilə Moskva regionunda yaşayan uşaqlar Azərbaycan musiqisi, rəqsləri və milli ənənələri ilə yaxından tanış olurlar.
AZƏRTAC-ın müxbiri Ulduz Əsgərova ilə mədəni layihələr, Azərbaycan irsinin təbliği və mərkəzin fəaliyyəti barədə söhbət edib.
-Ulduz xanım, “Dostluq-Drujba” Mərkəzinin yaradılması ideyası necə meydana gəldi və təşkilatın əsas məqsədləri nədən ibarətdir?
-Mərkəzinin yaradılması ideyası bir inamdan doğdu: xalqları bir-birinə ən çox yaxınlaşdıran məhz mədəniyyətdir. Biz çalışırıq ki, mədəniyyətimiz yalnız tədbirlər vasitəsilə deyil, həm də gənc nəslin gündəlik həyatının bir hissəsi kimi yaşasın. Məqsədimiz uşaqların öz milli kimliyini qoruyaraq böyüməsinə, eyni zamanda müxtəlif mədəniyyətlərə hörmət ruhunda formalaşmasına töhfə verməkdir.
-Mərkəziniz son dövrdə bir sıra mədəni layihələrdə iştirak edib. Azərbaycan mədəniyyətinin təqdimatı istiqamətində hansı tədbirləri xüsusi qeyd edərdiniz?
-Mərkəzimiz mütəmadi olaraq Moskvada keçirilən müxtəlif mədəni layihələrdə Azərbaycanı təmsil edir. Bu yaxınlarda “Qostinı dvor” Sərgi Mərkəzində keçirilən “Rusiyanın qəlbi” festivalında iştirak etdik. Tədbir zamanı Azərbaycan mədəniyyəti, milli geyimlərimiz, kəlağayı sənəti, adət-ənənələrimiz təqdim olundu. Ziyarətçilərin Azərbaycan stendinə böyük marağı bir daha göstərdi ki, mədəniyyət insanları yaxınlaşdıran ən gözəl vasitədir.
Bundan əlavə, Novruz bayramına həsr olunmuş tədbirlərdə, müxtəlif beynəlxalq mədəniyyət layihələrində iştirak etmiş, “Abdulla Şaiq uşaqların gözü ilə” yaradıcılıq gecəsi təşkil etmişik. Azərbaycan kəlağayısının təqdimatı, milli musiqi və rəqs proqramları da fəaliyyətimizin mühüm istiqamətlərindəndir.
-Mərkəzin nəzdində uşaqlar üçün xor və müxtəlif yaradıcılıq istiqamətləri də fəaliyyət göstərir. Burada hansı işlər görülür?
-Mərkəzimizdə əsasən Moskva və Moskva vilayətində yaşayan azərbaycanlı ailələrin övladları, eləcə də digər millətlərin nümayəndələri bir araya gəlirlər. Biz istəyirik ki, uşaqlar ana dilini və mədəniyyətini məcburiyyət kimi deyil, sevərək öyrənsinlər. Bilirsiniz, bu sualın çox sadə, amma eyni zamanda hər bir valideyn üçün həyati vacib olan bir cavabı var. Biz böyük bir həqiqəti dərk etməliyik ki, heç bir uşağa öz ana dilini, mədəniyyətini və milli dəyərlərini məcburi şəkildə sevdirmək olmaz. Bizim əsas təşəbbüsümüz və sirrimiz çox sadədir: uşaqlar bizim mərkəzə dostları ilə görüşməyə, səhnəyə çıxmağa, oynamağa gəlir. Amma o oyunların içində fərqinə varmadan dilini öyrənir: mahnı oxuyanda sözlərin tələffüzünü və musiqimizi öyrənir, ssenaridəki rolunu əzbərləyəndə dil biliyini mükəmməlləşdirir, rəqs edəndə o ritmi ürəyinə yazır. Əgər uşağın öz dili, öz mədəniyyəti haqqında xatirələrində səhnə, alqışlar, dadlı çay, mehriban dostlar və sevgi dolu müəllimlər varsa, o, böyüyəndə də bu dəyərləri qoruyub saxlayacaq.
-Mərkəzin gələcək layihələri barədə nə deyə bilərsiniz?
-Azərbaycan mədəniyyətinin və milli ənənələrinin təbliği bizim fəaliyyətimizin əsas istiqamətlərindən biridir. Qarşıda bizi bir sıra maraqlı layihələr gözləyir. Yaxın gələcəkdə böyük hesabat konsertimizin keçirilməsi nəzərdə tutulur. Burada uşaqlarımız Azərbaycan milli rəqsləri və mahnıları ilə çıxış edəcəklər.
Digər maraqlı layihəmiz “İpək və yunun sintezi: kəlağayı və Pavlovo-Posad şalları” adlanır. Burada Azərbaycanın zərif kəlağayı sənəti ilə Rusiyanın məşhur Pavlovo-Posad şallarının özünəməxsus gözəlliyini bir araya gətirməyi planlaşdırırıq. Bundan başqa, Azərbaycan çay mədəniyyətini, milli qonaqpərvərlik ənənələrimizi təqdim edən layihələr də hazırlayırıq. Bir sözlə, layihələrimizlə həm milli dəyərlərimizi gələcək nəslə ötürür, həm də dünyada layiqincə tanıdaraq dostluq tellərini daha da möhkəmləndiririk. Düşünürəm ki, bütün ideyaları indidən ortaya qoymaq bir az qeyri-təvazökarlıq olar. Qoy onlar hələlik mənim ürəyimdə bir sirr olaraq qalsın və zamanı gələndə hər kəs üçün gözəl bir sürprizə çevrilsin.
Bölmənin digər xəbərləri
