Ülviyyə Fətəliyeva: Gümüş medalımızın gənclərə motivasiya olmasını istəyirik
Bakı, 27 noyabr, AZƏRTAC
Əvvəlcədən komanda olaraq bu yarışda iştirak etməyi çox arzulayırdıq. Son anda dünya çempionatında mübarizə aparacağımız rəsmiləşəndə böyük sevinc yaşadıq.
AZƏRTAC xəbər verir ki, bu sözləri İspaniyada keçirilən komandalar arasında dünya çempionatında gümüş medal qazanan qadın şahmatçılardan ibarət Azərbaycan millisinin üzvü Ülviyyə Fətəliyeva deyib.
O bildirib ki, yarışdan əvvəl əsas hədəfləri layiqli oyun nümayiş etdirərək mümkün qədər yaxşı nəticə qazanmaq olub: “Turnirdən əvvəl reytinqdə hansı yerdə olduğumuzla maraqlanmadıq. Vaxt az idi, buna görə rəqiblərimizi daha çox analiz etməyə çalışdıq. Açığı, neçənci komanda olmağımız bizim üçün o qədər də önəmli deyildi. İlk məqsədimiz qrupdan çıxmaq idi. Pley-offda isə əzmkarlığımız daha da artdı. Komanda olaraq sona qədər mübarizə aparmağa çalışdıq. Linaresdə göstərdiyimiz oyun üçün bütün komanda yoldaşlarıma, kapitanımıza və məşqçilərimizə minnətdaram”.
Şahmatçı ən çətin görüşün FIDE komandasına qarşı olduğunu vurğulayıb: “Bu həm final idi, həm də rəqib ən güclü heyətlə çıxış edirdi. FIDE yığmasında reytinqdə ilk onluğa və iyirmiliyə daxil olan super ulduz şahmatçılar mübarizə aparırdı. Düzünü desəm, onlara qarşı oynamaq bir qədər ağır idi. Qazaxıstanla matçı da çətin qarşılaşmalardan biri hesab edirəm. Səkkiz oyunun hamısında heç-heçə qeydə alındı. Blitsdə qələbə qazanmağımız həm çətin oldu, həm də komanda ruhunu yüksəltdi”.
Fətəliyeva bildirib ki, turnirin davamında komandanın inamı daha da artıb: “İspaniya üzərində qələbədən sonra sona qədər irəliləyə biləcəyimizə inandıq. Bunun üçün bütün gücümüzü səfərbər etdik. Final mərhələsində yorğunluq hiss olunurdu. Gün ərzində 10-12 saat şahmat analizləri edirdik. Təsəvvür edin, belə rejimdə gündə iki matç oynamaq nə qədər çətin olur. İlk günlər bunu hiss etmirdik, amma sonradan Gürcüstan, Qazaxıstan və FIDE ilə oyunlarda yorğunluq özünü göstərməyə başladı. Gümüş medalımızın qızılın xəbərçisi olmasını istəyirik”.
Şahmatçı komandanın dünya çempionatında iştirakının da son anda təsdiqləndiyini xatırladıb: “Azərbaycan Şahmat Federasiyasının prezidenti Mahir müəllim bizə 1992-ci ildə Avropa çempionatında Danimarka yığmasının son anda turnirə qatılıb uğur qazanması barədə danışdı. Bu, bizim üçün motivasiya oldu. Həqiqətən, idmanda belə hallar tez-tez baş verir: yarışda iştirakın son anda rəsmiləşəndə həm fərdi, həm də komanda olaraq yaxşı nəticə göstərmək mümkün olur. Qızlarla söhbət edərkən bu ənənəni davam etdirmək barədə düşünürdük və buna nail olduğumuz üçün çox sevinirik”.
O, sonda dünya çempionatında qazanılan uğurun gənclərə inspirasiya olacağını bildirib: “Bizə dəstək olan hər kəsə təşəkkür edirik. Kapitanımız İlahə Qədimovaya, məşqçilər Nicat Abasov və Qədir Hüseynova, federasiya prezidenti Mahir Məmmədova, ailəmizə və dostlara minnətdarıq. Ümid edirəm ki, gümüş medalımız gənclər və uşaqlar üçün böyük motivasiya olacaq. Arzu edirik ki, bizim nəticəmiz onların ürəyində işıq yandırsın və gələcəkdə daha böyük uğurlar qazansınlar”.
Bölmənin digər xəbərləri
