Kembricdə “Qarabağ yallısı” üzrə məşğələlər mütəmadi keçirilir

Bakı, 19 oktyabr, Anarə Axundova, AZƏRTAC

2023-cü ilin iyunundan başlayaraq, İngiltərənin Kembric şəhərində ayda bir dəfə Azərbaycan milli rəqsləri üzrə məşğələlər keçirilir. Dərslər Azərbaycan rəqs mədəniyyətinə qoşulmaq istəyən hər kəs üçün açıqdır.

Layihənin təşkilatçısı Ülviyyə Pepinova AZƏRTAC-ın müxbiri ilə söhbətində bu ideyanın yaranması və məşğələlərin necə keçirilməsi barədə fikirlərini bölüşüb. Həmyerlimiz İngiltərədə yaşayan, “Chelsea Young Writers” uşaqlar üçün kreativ yazı üzrə şirkətin təsisçisidir. O, Azərbaycan diasporunun həyatında fəal iştirak edir, XX əsrin əvvəllərində Azərbaycan ictimai-siyasi təfəkkürünün banilərindən biri, maarifçi-islahatçı, publisist və “Molla Nəsrəddin” jurnalının həmtəsisçisi Ömər Faiq Nemanzadənin tarixi irsinin bərpası üzrə memorial layihə həyata keçirir.

-Ülviyyə xanım, sizin fəaliyyətiniz əvvəllər rəqslərlə bağlı deyildi. Bu layihənin ideyası necə yarandı?

-Hər şey çox təbii və hətta öz-özünə əmələ gəldi. Evimin yaxınlığında aşkarladığım klubda balkan xalq rəqsləri üzrə məşğələlər keçirilir. Klubun məlumatında göstərilmişdi ki, burada Qafqaz xalq rəqsləri üzrə də məşğələlər təşkil olunur. Maraqlanandan sonra mənə məlum oldu ki, çox təəssüf, bu proqrama Azərbaycan rəqsləri daxil edilməyib. Lakin təşkilatçılar mənə dedilər ki, onlar böyük məmnuniyyətlə və maraqla yerli auditoriyanı Azərbaycanın rəqs irsi ilə tanış etmək istərdilər. Mən təqdim olunan bu fürsətdən dərhal istifadə etdim və bu kiçik, lakin maraqlı layihəyə başladım. Mən peşəkar xoreoqraf və Azərbaycan xalq rəqsləri müəllimi tapmağa nail oldum. Azərbaycan Diasporuna Dəstək Fondunun qayğıkeşliyi və yardımı sayəsində bu ilin iyunundan ayda bir dəfə Kembricdə həm uşaqlar, həm də böyüklər üçün Azərbaycan rəqsləri üzrə məşğələlər keçiririk.

-Mən bilirəm ki, ingilislər də sizin məşğələlərdə olurlar. Layihə ilk gündən bu hədəfə istiqamətlənmişdi?

-Mən iki hədəf auditoriyasını nəzərdə tuturam - İngiltərənin Azərbaycan icmasını və britaniyalıları. Lakin bu, təkcə ingilislər deyil, həm də beynəlxalq ictimaiyyətin təmsilçiləridir. Axı Kembric bütün ölkə kimi, müxtəlif tərkibi, müxtəlif etnik komponentlərin və mədəniyyətlərin mövcudluğu ilə fərqlənir. Buna görə də Azərbaycan rəqs irsini inkişaf etdirməklə məşğul olmağım mənim üçün daha maraqlıdır. Həmyerlilərimiz və onların uşaqları arasında mədəni irsimizin qorunub saxlanmasının vacibliyini qeyd etmək yerinə düşər. Bu ondan ötrüdür ki, onlar Britaniya cəmiyyətinə inteqrasiya ilə yanaşı, öz tarixi vətənləri ilə əlaqəni kəsməsinlər, olduqca açıq və hər şeyi əhatə edən Britaniya mədəniyyətinin zənginləşməsinə öz töhfələrini verə bilsinlər.

-Azərbaycan rəqslərinin çox növü var. Siz məşğələlərdə məhz hansı rəqsləri öyrənirsiniz?

-Məşğələlərin keçirilməsi üçün mən bilərəkdən “Yallı” janrını seçmişəm. Birincisi, rəqsin bu növü qrup məşğələlərinə daha çox uyğundur. Eyni dövrədə əl-ələ tutaraq, addımbaaddım sinxron hərəkətlə biz bir-birimizlə yaxınlığın, birliyin xüsusi ruhunu hiss edirik.

Bu layihə sayəsində mən “Yallı” rəqsini daha dərindən öyrənməyə başladım və Azərbaycanın rəqslər üzrə aparıcı mütəxəssislərindən biri Rauf Bəhmənli ilə tanış oldum. Təsəvvür edin, məlum oldu ki, “Yallı”nın 500-ə yaxın növü unudulub. Yalnız Rauf müəllim kimi altruistlər Azərbaycanın hər yerindən zərrə-zərrə toplayaraq bu rəqslərin unudulmuş gözəlliyini və mənasını bərpa edir.

-Əcnəbilər Azərbaycan rəqslərini öyrənməyə nə dərəcədə nail olurlar? Onlarda öyrənmək alınırmı?

-Müəllimlə bizim seçdiyimiz ilk rəqs “Qarabağ yallısı”dır. Hərəkətlərin məcmusuna, xüsusi melodikliyinə və sözsüz ki, bütün azərbaycanlılar üçün rəmzi mənasına görə “Qarabağ yallısı”nı o saat gözaltı etdik. Əcnəbilərdə hər şey gözəl, heç də həmyerlilərimizdəkilərdən pis alınmır.

-Siz artıq vurğuladınız ki, məşğələlər peşəkar xoreoqraf tərəfindən aparılır. Əcnəbilərlə işləmək ona çətindirmi?

-Bəli, Səkinə Muxtarlı peşəkar xoreoqraf və Azərbaycan xalq rəqsləri müəllimidir, o, İngiltərənin şimalında yaşayır. Səkinə ayda bir dəfə Kembricə və geriyə uzaq yol qət edir, bununla belə, Azərbaycan xalq rəqslərinin Britaniyada inkişaf etdirilməsi kimi ümumi missiyamızda müsbət və qətiyyətli əhvali-ruhiyyədə qalmaqdadır. Əcnəbilərlə işləmək çətinlik törətmir, axı onların hamısı xoş niyyət və coşqu ilə gəlirlər. Yeri gəlmişkən, Səkinə İngiltərədə Azərbaycan diasporunun rəsmi tədbirlərində tez-tez çıxış edir.

-Bəs siz öz qrupunuzla hansısa tədbirdə iştirak etmək, yaxud konsert təşkil etmək istərdinizmi?

-Tədbirlərdə çıxışlar barədə danışmaq hələ tezdir. Lakin biz çox istərdik ki, məşğələlərə müntəzəm qatılan insanlardan mədəni irs üzrə yerli festivallarda və tədbirlərdə çıxış etmək üçün bir qrup düzəldək.

-Məşğələlər hansı formatda keçirilir?

-Məşğələlər olduqca gərgin keçir, dincəlmək üçün kiçik fasilələrlə saat yarım davam edir. Heç kim üçün sirr deyil ki, rəqslər fitnesin növlərindən biridir, fiziki tonusu artırır, yaxşı və müsbət əhvali-ruhiyyə yaradır. Bundan başqa, mən fürsətdən istifadə edərək, Azərbaycan mədəniyyəti üzrə çap ədəbiyyatını, broşürləri, kataloqları təqdim edir, iştirakçıları məşğələlərdən sonra Azərbaycanın ənənəvi şirniyyatları ilə çay süfrəsinə, milli nərd oyununa dəvət edirəm. Beləliklə, deyə bilərəm ki, mən ayda bir dəfə Kembricdə Azərbaycanın bir növ mədəniyyət günlərini keçirməyə nail oluram.

Qeyd edim ki, 2023-cü ilin sonunadək rəqs üzrə məşğələlər oktyabrın 21-də, noyabrın 25-də və dekabrın 16-da keçiriləcək.