ÜMUMDÜNYA ƏRZAQ PROQRAMININ İCRAÇI DİREKTORU MƏCBURİ KÖÇKÜNLƏR VƏ QAÇQINLARLA GÖRÜŞMÜŞDÜR

26.07.2006 [18:22]
Çap et
A⁺ A^-

AZƏRTAC xəbər verir ki, iyulun 26-da BMT-nin Ümumdünya Ərzaq Proqramının icraçı direktoru Ceyms Morrisin rəhbərlik etdiyi nümayəndə heyəti Azərbaycana səfəri çərçivəsində Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri, Beynəlxalq humanitar yardım üzrə Respublika Komissiyasının sədri Əli Həsənov ilə birlikdə qaçqın və məcburi köçkünlərin yığcam məskunlaşdıqları Muğan bölgəsinin bir sıra rayonlarında olmuşdur.

Qonaq Sabirabadda “Qalaqayın” çadır düşərgəsində, İmişlidə dəmir yolu üzərindəki yük vaqonlarında və Biləsuvarda yeni salınmış qəsəbələrdə yaşayan soydaşlarımızla görüşmüş, onların həyat və məişəti ilə tanış olmuşdur. Məcburi köçkünlər Ceyms Morrisə uzun müddət Azərbaycanda fəaliyyət göstərdiklərinə və ərzaq proqramının davamının yenidən iki il müddətinə uzadılmasına görə razılıqlarını bildirmişlər.

Minnətdarlıqla xatırlanmışdır ki, ölkəmizin Prezidenti İlham Əliyev 2005-ci il fevralın 24-də İtaliyaya səfəri zamanı BMT-nin Ümumdünya Ərzaq Proqramının icraçı direktorunun müavini ilə görüşərək məcburi köçkünlər öz doğma yurdlarına qayıdana qədər onlara humanitar yardımların göstərilməsinin vacib olduğunu bir daha diqqətə çatdırmışdır. Bunun nəticəsi olaraq, 2006-cı il iyulun 1-dən 2008-ci il iyunun 30-dək 24 aylıq müddətə BMT-nin Ümumdünya Ərzaq Proqramının Azərbaycanda qaçqın, məcburi köçkün və aztəminatlı ailələrə 15,66 milyon ABŞ dolları məbləğində humanitar yardımların davam etdirilməsi barədə qərarı qəbul olunmuşdur.

Qonaq məcburi köçkünlərin həyat şəraitinin çətinlikləri ilə bağlı müşahidələrinin onun qəlbində dərin təəssüf hissi doğurduğunu söyləmişdir.