Ümumdünya Gömrük Təşkilatı Risklərin İdarə edilməsi üzrə Diaqnostik Missiyanı həyata keçirir
Bakı, 3 mart, AZƏRTAC
Ümumdünya Gömrük Təşkilatı (ÜGT) martın 3-dən etibarən Dövlət Gömrük Komitəsində və komitənin strukturuna daxil olan müvafiq qurumlarda Risklərin İdarə edilməsi üzrə Diaqnostik Missiyanı həyata keçirir. Bu məqsədlə Ümumdünya Gömrük Təşkilatının ekspertləri Oğuz Onal, Sertac Yapıcı və Ömər Koç respublikamızda səfərdədir.
Komitənin Mətbuat və İctimaiyyətlə Əlaqələr İdarəsindən AZƏRTAC-a bildirilib ki, ÜGT-nin prosesi həyata keçirəcək mütəxəssisləri ilə görüşən Dövlət Gömrük Komitəsi sədrinin birinci müavini, gömrük xidməti general-leytenantı İsmayıl Hüseynov iki qurum arasındakı səmərəli əməkdaşlıqdan məmnunluqla bəhs edib, qarşılıqlı münasibətlərin daha da inkişaf edəcəyinə əminliyini bildirib.
Son illərdə Prezident İlham Əliyevin rəhbərliyi ilə gömrük sistemində aparılan islahatların uğurla reallaşdırılmasında ÜGT-nin tövsiyələrinin əhəmiyyətinə toxunan İ.Hüseynov bu çərçivədə tətbiq edilən Risklərin İdarə edilməsi Sisteminin də gömrük işinin səmərəli təşkilinə, gömrük əməliyyatlarının, sərhədkeçmə proseslərinin sürətləndirilməsinə şərait yaratdığını bildirib.
Martın 3-də başlayan diaqnostik qiymətləndirmə prosesi 7 gün davam edəcək. ÜGT-nin ekspertləri tərəfindən idarə edilən proses çərçivəsində komitənin aidiyyəti qurumları təqdimatlarla çıxış edəcək və müxtəlif mövzularda müzakirələr aparılacaq.
Bölmənin digər xəbərləri
