Ümummilli Liderin 100 illik yubileyi Polşanın Qnejno şəhərində də qeyd edilib
Bakı, 10 may, AZƏRTAC
Azərbaycan xalqının Ümummilli Lideri Heydər Əliyevin anadan olmasının 100-cü ildönümü ilə əlaqədar Polşanın ilk paytaxtı və dini mərkəzi Qnejno şəhərində Azərbaycan-Polşa “Dostluq” abidəsi ziyarət olunub.
Ölkəmizin Polşadakı səfirliyindən AZƏRTAC-a bildiriblər ki, əvvəlcə şəhərin mərkəzi parkında ucaldılan abidənin önünə əklil qoyulub.
Tədbirdə çıxış edən səfir Nərgiz Qurbanova dahi siyasi xadim Heydər Əliyevin həyatı, ölkəmizin inkişafı, güclü, nüfuzlu dövlətə çevrilməsi istiqamətində fəaliyyəti barədə məlumat verib.
Qeyd olunub ki, müstəqilliyin bərpasından bəri qazanılan bütün mühüm nailiyyətlərdə xalqımızın Ümummilli Lideri, müstəqil Azərbaycan dövlətinin qurucusu, görkəmli siyasi və dövlət xadimi Heydər Əliyevin müstəsna rolu olub. Azərbaycan xalqı yeni əsrə və yeni minilliyə məhz Heydər Əliyev zəkasının işığında qədəm qoyub. Heydər Əliyevin zəngin həyat yolu və müstəsna fəaliyyətinin bütün mərhələləri bir-birini tamamlayıb, öz xalqına sıx bağlılığın, milli dövlətçilik məfkurəsinə sadiqliyin canlı təcəssümü olub. Geniş bilik və dərin təfəkkür sahibi olan Heydər Əliyev düşünülmüş və cəsarətli qərarları ilə təkcə müstəqillik dövründə deyil, bütün dövrlərdə Azərbaycan ictimaiyyətini ən ciddi şəkildə düşündürən məsələləri uğurla həll edib.
Diplomat vurğulayıb ki, dövrünün ən nüfuzlu siyasətçiləri ilə bir sırada duran Ulu Öndər Azərbaycanın müasir simasının, xalqımızın zəngin dəyərlərinin tanıdılması və ölkəmizin beynəlxalq münasibətlər sistemində layiqli mövqe qazanmasında müstəsna rol oynayıb. Nəticədə, qısa zaman kəsiyində Heydər Əliyev şəxsiyyəti Azərbaycanın yaxın tarixinin axarını dəyişib və bədbin proqnozların əksini sübut edib. Görkəmli dövlət xadiminin siyasi kursu ölkənin daxili və xarici siyasəti ətrafında həm milli həmrəyliyi təmin edib, həm də təhlükəsizlik vəziyyətini sabitləşdirib. Azərbaycan xalqının mənafeyi əsasında müəyyən olunan və milli maraqlardan qaynaqlanan yeni xarici siyasət strategiyası diplomatiyanın təməl prinsiplərinə xas şəkildə həyata keçirilməyə başlanılıb. Beləliklə, Heydər Əliyevin dövrün və gələcək illərin çağırışlarına cavab verən, ölkəmizi əhatə edən geosiyasi reallığı nəzərə alan və xalqımızın zəngin dövlətçilik tarixindən nəticə çıxaran siyasi kursu qüdrətli Azərbaycanın təməli olub. Ulu Öndərin şah əsəri olan güclü Azərbaycan dövləti öz suverenliyini, müstəqilliyini qorumağa qadir olduğunu 44 günlük Vətən müharibəsində şanlı Zəfər qazanmaqla sübuta yetirib.
Ümummilli Liderin Azərbaycan-Polşa münasibətlərinin inkişafına verdiyi töhfələrə də toxunan N.Qurbanova onun strateji qərarlarının gələcək möhkəm əlaqələrə zəmin hazırladığını vurğulayıb. Diqqətə çatdırılıb ki, möhkəm təməllərə söykənən ikitərəfli münasibətlər Prezident İlham Əliyev tərəfindən daha da inkişaf etdirilib və əlaqələr strateji tərəfdaşlıq səviyyəsinə yüksəldilib.
Sonda Ümummilli Lider Heydər Əliyevin yalnız Azərbaycan xalqı və dövləti üçün göstərdiyi xidmətlərlə deyil, eyni zamanda, Azərbaycan-Polşa əlaqələrinin formalaşmasında oynadığı tarixi rol ilə hər zaman ehtiramla yad ediləcəyi vurğulanıb.
Bölmənin digər xəbərləri
