UNICEF: Uşaqlar Yaxın Şərqdəki münaqişələrin əsas qurbanlarıdır
Bakı, 7 mart, AZƏRTAC
Yaxın Şərqdə zorakılıq artmaqdadır. Regiondakı bir neçə ölkə hücumlar və cavab zərbələri barədə məlumat verir ki, bu da münaqişənin genişlənməsi, qeyri-sabitliyin dərinləşməsi və humanitar vəziyyətin pisləşməsi ilə bağlı narahatlıqlar yaradır. BMT agentlikləri xəbərdar edir ki, böhran ən azı 16 ölkəyə təsir edib, mülki əhali arasında qurbanların sayı, köçkün şəxslərin sayı və həyati əhəmiyyətli infrastruktura dəyən ziyan artır.
AZƏRTAC xəbər verir ki, İrana qarşı davam edən hücumlar fonunda Birləşmiş Millətlər Təşkilatının Uşaq Fondu (UNICEF) uşaqlar üçün ağır nəticələr barədə məlumat verib.
Təşkilat uşaqların, məktəblərin və tibb müəssisələrinin beynəlxalq humanitar hüquq normaları ilə müdafiə olunduğunu xatırladır və bütün tərəfləri mülki əhalinin müdafiəsini təmin etməyə çağırır.
Cenevrədə jurnalistlərin qarşısında çıxış edən BMT-nin İnsan Hüquqları üzrə Ali Komissarı Folker Türk qeyd edib ki, beynəlxalq hüquqa əməl edilməsi gələcəkdə gərginləşmənin qarşısını almaq və onsuz da qeyri-mütənasib ağır itkilər verən mülki şəxsləri, xüsusən də uşaqları qorumaq üçün vacib elementdir.
Bu arada, Beynəlxalq Miqrasiya Təşkilatı (BMQT) xəbərdarlıq edir ki, Yaxın Şərqdə artan böhran səbəbindən dəniz yollarında yaranan fasilələr artıq gəmiçilik xərclərinin artmasına və humanitar yardımların çatdırılmasında gecikmələrə səbəb olub. BMQT-nin Humanitar reaksiya və bərpa üzrə direktor müavini Anne-Katrin Şefer bildirib ki, Hörmüz boğazında və Qırmızı dənizdə qeyri-sabitlik gəmiçilik şirkətlərini hər konteyner üçün təxminən 3 min dollar “qəza əlavə ödənişi” tətbiq etməyə məcbur edir.
Bu əlavə xərclər və gecikmələr bölgədə və ondan kənarda humanitar əməliyyatlar üçün nəzərdə tutulmuş çadırlardan tutmuş günəş lampalarına qədər vacib təchizatın çatdırılmasına təsir göstərir.
Hörmüz boğazı dünyanın əsas dəniz dəhlizlərindən biri olaraq qalır: buradan hər gün qlobal neft ticarətinin təxminən beşdə biri və əhəmiyyətli həcmdə kommersiya yükləri keçir. Bu dar keçiddə gəmiçilikdə hər hansı bir fasilə dərhal enerji bazarlarına və qlobal təchizat zəncirlərinə təsir göstərir, nəqliyyat və sığorta xərclərini artırır.
Yanacaq və dəniz daşımalarından asılı olan humanitar təşkilatlar üçün Hörmüz boğazındakı qeyri-sabitlik, Qırmızı dənizdən keçən marşrutlarında gərginliklə birlikdə, həyati əhəmiyyətli yardımların çatdırılmasında gecikmələr və dünya miqyasında əməliyyatlarda artan xərclər deməkdir.
Artan ehtiyaclar fonunda BMT-nin humanitar strukturları ciddi maliyyə çatışmazlığı ilə üzləşirlər. BMQT-nin Livandakı nümayəndəsi Matye Luçano maliyyələşdirmənin yerlərdəki ehtiyacların miqyası ilə müqayisədə “olduqca qeyri-kafi” olduğunu vurğulayıb.
Bölmənin digər xəbərləri
