UNICEF: Venesuelada azı 680 min uşaq humanitar yardıma möhtacdır
Bakı, 29 iyun, AZƏRTAC
UNICEF bazar günü bildirib ki, iyunun 24-də Venesuelada baş verən zəlzələlərdən sonra humanitar yardıma ehtiyacı olan 1,8 milyon insan arasında təxminən 680 min uşaq var.
AZƏRTAC BMT-nin məlumatına istinadla xəbər verir ki, xəstəxanalara, məktəblərə və su sistemlərinə dəyən ziyan zəlzələlərdən təsirlənən ailələrin vəziyyətini daha da ağırlaşdırır və onların çoxu hələ də köçkün vəziyyətdədir. Son hesablamalara görə, iki zəlzələ azı 1430 nəfərin ölümünə və 3238 nəfərin yaralanmasına səbəb olub.
UNICEF-in yeni qiymətləndirməsi dağılmış binalardan daha da genişlənən böhranı əks etdirir. Zəlzələ yüz minlərlə uşağın səhiyyə xidmətlərinə, təhlükəsiz suya, qorunmaya və təhsilə çıxışını təhlükə altına qoyub. “Xəstəxanalar yaralılarla doludur, minlərlə uşağın təmiz suya etibarlı çıxışı yoxdur və bir çox məktəbə ziyan dəyib. UNICEF Venesuela hökuməti və tərəfdaşları ilə birlikdə uşaqlara və ailələrə dəstəyi artırmaq üçün çalışır, lakin qarşıdakı həftələrdə cavab tədbirlərini davam etdirmək üçün davamlı maliyyələşdirmə vacib olacaq”, -deyə UNICEF-in Venesueladakı nümayəndəsi Manuel Rodriges Pumarol bildirib.
Agentlik bildirib ki, La Quayra, Karakas, Karabobo, Araqua və Falkondakı xəstəxanalara dəyən ziyan uşaqlara və hamilə qadınlara qulluq edilməsinə təsir göstərir.
Paytaxt rayonunda təhsil müəssisələrinin üçdəbirindən çoxuna - 432 məktəbə ziyan dəyib. Təhlükəsiz qalan bəzi məktəblər məcburi köçkün ailələri üçün müvəqqəti sığınacaq kimi istifadə olunur.
UNICEF səhiyyə, qidalanma, su və sanitariya, uşaqların müdafiəsi və təhsil sahələrində dəstək məqsədilə 234 min uşağa yardım məqsədilə əlavə işçi heyəti və ləvazimatlarını səfərbər edib. Agentliyin 20 ton tibbi ləvazimat, su və sanitariya avadanlıqları daşıyan ilk reysi ölkəyə çatıb. UNICEF-in Kopenhagendəki qlobal təchizat mərkəzindən ikinci yükün yaxın günlərdə göndərilməsi gözlənilir.
BMT-nin Venesueladakı humanitar yardım koordinatoru Canluka Rampolla zəlzələdən ən çox təsirlənən La Quayra ştatına ilk missiyasını həyata keçirib. Missiya səlahiyyətlilərlə birlikdə evlərini itirən və ya geri qayıda bilməyən ailələr üçün xidmətlərin göstəriləcəyi yerləri müəyyənləşdirib. Rampolla bildirib: “Qlobal miqyasda baş verən pis hadisələrə diqqət yetirdiyimiz bir vaxtda, dünyanın hər yerindən venesuelalılara dəstək olmaq üçün həmrəylik jesti var. Əsas vəzifə hələ də sağ qalan insanları dağıntılar altından çıxarmaqdır və buna görə də dünyanın hər yerindən gələn qrupları dəstəkləmək və əlaqələndirmək çox vacibdir. Eyni zamanda, sağ qalanları da dəstəkləməliyik”.
Bölmənin digər xəbərləri
