V AVRASİYA İQTİSADİ ZİRVƏ TOPLANTISI ÖZ İŞİNİ BAŞA ÇATDIRMIŞDIR
Sentyabrın 26-28-də Türkiyənin İstanbul şəhərində Avropa və Asiyanın 26 ölkəsinin yüksək səviyyəli dövlət və qeyri-dövlət təşkilatları nümayəndələrinin iştirakı ilə V Avrasiya iqtisadi zirvə toplantısı keçirilmişdir. Zirvə toplantısının işində Azərbaycanın iqtisadi inkişaf naziri Fərhad Əliyev və Prezidentin İcra Aparatının ictimai-siyasi şöbəsinin müdiri Əli Həsənov, Milli Məclisin, bir sıra nazirliklərin və qeyri-hökumət təşkilatlarının nümayəndələri iştirak etmişlər. Əli Həsənov Azərbaycan Respublikasının Prezidenti Heydər Əliyevin zirvə toplantısının iştirakçılarına təbrikini oxumuşdur. Təbrikdə zirvə toplantısına yüksək qiymət verilmiş, bu mötəbər tədbirin iştirakçısı olan dövlətlərin iqtisadi əlaqələrinin inkişafında böyük əhəmiyyəti vurğulanmış, sammitin işinə uğurlar arzulanmışdır.
Mərmərə Qrupu Strateji və Sosial Araşdırmalar Vəqfinin təşkilatçılığı və Türkiyə hökumətinin bilavasitə dəstəyi ilə keçirilən toplantıda MDB-nin bir sıra ölkələrinin, Türkiyə, Yunanıstan, İspaniya, İtaliya, Yaponiya, İran, Rumıniya, Bolqarıstan, Monqolustan, Avstriya, Macarıstan, Slovakiya, Makedoniya və s. ölkələrin, NATO, DTT, OPEK, ATƏT, Avropa Birliyi, Avropa İnvestisiya Bankı kimi beynəlxalq təşkilatların və maliyyə qurumlarının yüksək vəzifəli nümayəndələri iştirak etmişlər. Tədbirdə qloballaşma ilə mübarizədə ölkələrarası iqtisadi əlaqələrin daha da genişləndirilməsinin vacibliyi, Avrasiya ölkələrində enerjinin bu günü və sabahı, ölkələrarası turizm, bank işi və ətraf mühitin qorunması sahələrində qarşılıqlı əlaqələr, xarici sərmayə qoyuluşları, ölkələrarası ticarətin perspektivləri və s. məsələlər barədə məruzə və çıxışlar dinlənilmiş, geniş fikir mübadiləsi aparılmışdır.
Azərbaycanın iqtisadi inkişaf naziri F.Əliyev məruzəsində Prezident Heydər Əliyevin rəhbərliyi ilə ölkədə aparılan iqtisadi islahatlar, iqtisadi idarəetmənin təkmilləşdirilməsi, özəlləşdirmə prosesinin gedişi barədə geniş məlumat vermiş, son illərdə ÜDM-də özəl bölmənin xüsusi çəkisinin dinamik şəkildə artdığını, inflyasiyanın səviyyəsinin aşağı olduğunu, ümumən, ardıcıl iqtisadi inkişafa nail olunduğunu xüsusi vurğulamışdır. O, Azərbaycanda sahibkarlığın inkişafına ölkə rəhbərliyi tərəfindən böyük diqqət və qayğı göstərdiyini, bu sahədə dinamik inkişafın təmin edilməsi üçün hər cür şərait yaratdığını bildirmişdir. Nazir Prezidentin Fərmanı ilə təsdiq edilmiş “Azərbaycan Respublikasında kiçik və orta sahibkarlığın inkişafının Dövlət Proqramının (2002-2005-ci illər)”, lisenziyalaşdırma sisteminin təkmilləşdirilməsi, sahibkarlığın inkişafına süni maneələrin aradan qaldırılması, kiçik və orta biznesin inkişafına dövlətin maliyyə dəstəyinin gücləndirilməsi ilə bağlı son zamanlar qəbul edilmiş qərarların ölkədə sahibkarlığın inkişafında böyük əhəmiyyəti olduğunu vurğulamışdır.
Səfər çərçivəsində F.Əliyev Türkiyə Sənaye Odasında, “ENKA Holdinq” şirkətlər qrupunda, “Ulisoy Holdinq”, “Çanakkale Seramik” şirkətlərində, Türkiyə Turizm Agentlikləri Birliyində, bir sıra digər şirkət və təşkilatlarda yerli iş adamları ilə görüşmüşdür. O, hazırda Azərbaycan iqtisadiyyatının əksər sahələrində qardaş Türkiyənin iş adamlarının uğurla çalışdıqlarını, Azərbaycana sərmayə qoyuluşunda önəmli yer tutduqlarını vurğulamış, ölkəmizdə əlverişli sərmayə mühitinin yaradılması, sahibkarlığın hüquqi təminatının yaxşılaşdırılması sahəsində kompleks tədbirlərin həyata keçirildiyi barədə geniş məlumat vermişdir. Nazir türkiyəli iş adamlarını kənd təsərrüfatı, turizm, tikinti, nəqliyyat, elektroenergetika, toxuculuq və s. sahələrdə geniş əməkdaşlığa dəvət etmişdir.
Fərhad Əliyev və Əli Həsənov STV, TV-8 televiziya kanallarında çıxış edərək, ölkəmizdə həyata keçirilən islahatlar, Prezident Heydər Əliyevin Türkiyə-Azərbaycan münasibətlərinin hərtərəfli inkişafı istiqamətində yeritdiyi siyasət və s. məsələlərdən danışmış, bir sıra mətbuat orqanlarına müsahibələr vermişlər.
Bölmənin digər xəbərləri
