Valeriya Məmmədova: Azərbaycan voleybolçuları ölkəmizə Avropa çempionatının medallarını qazandıracaqlar
Bakı, 30 sentyabr, Pərvanə Rəhimova, AZƏRTAC
Voleybol üzrə qadınlardan ibarət Azərbaycan yığması Bakıda keçirilən Avropa Çempionatının dörddəbir finalında Almaniya komandası ilə matçda 3:0 hesabı ilə qalib gələndən sonra komandamızın liberosu (yalnız müdafiə funksiyasını yerinə yetirən oyunçusu) Valeriya Məmmədova AZƏRTAC-a müsahibə verib.
O deyib: “Biz Avropanın ən güclü dörd komandası siyahısına düşmüşük. Bu, bizim üçün böyük nailiyyətdir. Ümidvaram ki, bundan sonra daha yaxşı oynayacaq və medallar qazanacağıq. Növbəti rəqibimiz Niderland yığmasıdır. Bu komanda optimal formadadır. Yarımfinal çox maraqlı olacaq. Bütün ölkə bizi dəstəkləsə, medallar qazanacağıq. Bunun üçün yaxşı şansımız var - azarkeşlər hər bir matçda bizi çox ciddi dəstəkləyirlər. Azarkeşlərin dəstəyi sayəsində Azərbaycan yığmasının voleybolçu qızları “evimizdə” keçirilən Avropa Çempionatının medallarını qazanacaqlar”.
Valeriya Məmmədova Almaniya voleybolçuları ilə matçı şərh edərək deyib ki, Azərbaycan yığması almaniyalı rəqiblərin taktikasını yaxşıca araşdırıblar. Bu komandanın çox güclü olmasını etiraf edən libero daha sonra deyib: “Onların qarşısını dərhal almaq lazım idi. Əks halda matçın gedişində onları dayandırmaq çox çətin olardı. Buna görə biz matçın lap əvvəlindən öz oyunumuzu diktə etmək üçün əlimizdən gələni etdik”.
Valeriya Məmmədova növbəti matç barədə fikirlərini bölüşərək bildirib ki, şənbə günü yarımfinalda bizim yığmamızın rəqibi Hollandiya komandası olacaq. O deyib: “Hollandiyanın qadınlardan ibarət voleybol yığması ən güclü komandalardan biri və bu çempionatın favoritlərindədir. Komandanın çox güclü voleybolçuları var. Hücumçulardan biri iştirak etmir, lakin mənim fikrimcə, bu fakt onların oyununa ciddi təsir göstərməyəcək. Hollandiya komandasında oyunçuların hər biri digərini əvəz edə bilər, lakin biz öz gücümüzə inanırıq. Düşünürəm ki, azarkeşlərin dəstəyi sayəsində doğma divarlar arasında qələbə qazana bilərik”.
Bölmənin digər xəbərləri
